Lah ban ther jur u lapbah bad ka eriong ia ka Meghalaya ha ki ar sngi ki ban wan

Syllad | The Rising MeghalayaMay 26, 2024

Ka Tnat Indian Meteorological Department (IMD) ka la pynmih ia ka jingmaham ia ka jingther jong u ‘lapbah haka 27 bad 28 tarik Jymmang.

Ka Tnat IMD ka la pyntip ba ka la sakhi halor ka jnglong jingman ha ka suinbneng ha ka thain Bay of Bengal ha kaba la khmih lynti ba kan don ka jingshah syllad ha ka ‘eriong ne cyclone ba jur ha ka step 26 tarik mynta u bnai ha ki thain shatei sepngi bad ki bynta ba iasoh jong ka thain shatei mihngi ka Bay of Bengal hashwa ba kan wan poi ha Bangladesh bad wan syllad ia kane ka Jylla naduh ka shiteng miet jong ka 26 tarik mynta u bnai ryngkat ka lyer kaba khlain bor.

Halor kane na ka liang ka sorkar Jylla ka la pynmih ia ka jingmaham kaba kyntu ia ki nongshong shnong ban long kiba husiar, ban pynkhreh ia ki tiar kiba donkam kyrkieh bad ban kiar na kaba leit sha kino kino ki kam ki bym dei kiba kongsan ha kaba kum kane ka por.

Namar kane ka jingpynsyier lyngba ki bor ka mariang, ki bor sorkar ki la pynpaw ruh halor ka jingdonkam ia ki lad jingiada bad pynkhreh nalor ki jingkyntu halor ki sienjam kiba dei bad ki bym dei ban leh na ka bynta ka jinshngain.

Kiba dei ban leh shwa ban jia u cyclone: Ym dei ban pynsngap ia ki khubor hamsaia, long jai jai bad wat klumar jingmut. Kynmaw ban charge ia ki mobile phone khnang ban lah ban pyndonkam ia ki SMS, Sngap ia ki jingpyntip lyngba ki radio, telebishon bad lyngba ki lad pathai khubor, ban pynlip ia ka main jong ka lain bording kumjuh ia ka gas connection, lada ka iing jong phi kam long kaba shngain mih noh shwa ban lap u cyclone.