Lah ban iaid paidbah ka KSA ha khappud Assam Meghalaya, dawa tuklar ka KSU na u DC WJH

Syllad | The Rising MeghalayaJune 28, 2019

JOWAI: Ka Khasi Students’ Union (KSU), Laskeiñ Circle kala dawa na u Deputy Commissioner jong ka West Jaiñtia Hills District (DC WJH) ban tuklar bad ban shimkhia ban khanglad ïaka jingthmu jong ka Karbi Students Association (KSA) bad ki paid Karbi ban ïaid paidbah ha jaka ba iakhajia pud hapdeng ka Assam Meghalaya.

Ka KSU haka dorkhat kaba la phah sha u DC WJH mynta ka sngi kala kam ba ka Karbi Students Association (KSA) ha ryngkat ki paid Karbi ki lah ban pynlong iaka jingiaid paidbah naduh na Mukoilum shaduh sha Wah Myntang bad na Wah Myntang shaduh sha Umkhyrmi ki jaka kiba hap haka jingiakhajia pud hadpeng Meghalaya Assam.

Kane ka jingthmu ïaid paidbah kan long lashai ka sngi ha katei ka jaka khappud.
Halor kane ka KSU Laskeiñ Cirlce kala kyrpad ïa u DC ban shimkhia khnang ba nym pynthud ïaka shongsaiñ ha katei ka thain.

Ka KSU kala kam ba ki paidbah ha katei thain khappud kila shongsyier mynsiem namar ba kim tip kaei ka ban jia bad lada kim ïoh ka jingiada na ka bos synshar district.

U DC West Jaiñtia Hills U Bah Garod LSN Dykes IAS ula ïathuh ba ula dep ïakren bad U DC West Karbi Anglong bad la ïathuh ba kam don ka jingtip kaba thikna halor kane, hynrei ula phah ïa u Executive Magistrate ban peit iaka jinglong jingman ka thain khappud.