Lada monjur ka Sorkar wow tyniap ya ki case wa da pynhap ya ki dkhot ka HNLC u lai beit i klam yasuk: Sadon Blah

Syllad | The Rising MeghalayaJanuary 8, 2024

Ynne ka 8 tarik Duiatra ki yahkhmat ka Hynniewtrep National Liberation Council (HNLC) da klam che ki ya ka Sorkar wa i klam yasuk u man i, lada ka Sorkar bien ko u tyniap nae pyndam lut ya waroh ki mokotduma wa da pynhap ya ki dkhot ka HNLC iwa man hapoh ka Sorkar Jylla kamjooh ha ka Sorkar Bei.

Hadien wa ki yahkhmat ka HNLC da phah ki dei jingthoh cha u Ksiang iong ka Sorkar ma PS Dkhar wa kamjooh cha u Sadon K Blah, President Hynniewtrep National Youth Front (HNYF) waman leh u ksiang neiliang ka HNLC, u Sadon K.Blah da ong u leh heiyatoh weini I kam damih ar tylli ki dak Jingkylli waheh, kiwa ong toh nae ym toh ya ka Sorkar wow leh ko yeini I kam da ka luti iong ka ain? Toh nae ymtoh ya ka Sorkar wow lai ko da ka sur kat kam I bor I snaiwthuh iongka ne ka dur iong ka politic?

Chooh chooh ong u, lada ka Sorkar ong ko ieh ym wan ka HNLC chakhmat wow yaklam tangwa iwa sah toh I bor ka yung bichar nae ka ain wow leh, ini I pyrkhat toh iwa bakla dooh neibhah waroh ki thma iong ki ri ka pyrthai jia ki wei poi ki cha ka luti i yasuk  yasniawthuh ymtoh dei bor ka ain, da ka luti I klam yasniawthuh wa ki bor synchar nae ka sorkar.

Neiliang u Sadon K Blah da klam che u wa lada ka Sorkar hi em ko itae I mynsien wow wanrah sakhiat yei tae I chongsuk chongsain ymtoh iwa eh ya ka wow leh ko yeini, iwa khatdooh hi chong ha ka sorkar wei da pynksan u leh yeini I klam iong-o dei wa kdaw nongmuna yei kynrum kynram wamih ha u snem 2013 iwa yatoh wei yakhih ILP ki Seinbhalang, heiwa iyi iyi I eh I khoo, ki ain ki kyndon wa khoom wakdooh ya ki dkhot iong ki Seinbhalang da ye u looid u slo hapyrdi ki bor ka ain wa ki dkhot iong ki Seinbhalang du da ka luti I klam Yasuk-Yasniathuh kawa daman hei por u Mukul Sangma kam u Chief Minister ka Sorkar Jylla.

Iwa khatdooh kam u President ka Hynniewtrep National Youth Front, pynrem joor u yeini I leh ka Sorkar MDA iwa pynioo yei man wym chynna jngai ki nongialam ka Sorkar hei wow wanrah sakhiat yei chongsuk chongsain.