Lada ka don ka bneng ka dei ha India, lada don ka mynsiem bneng, ka dei ha Meghalaya: Vice President

Syllad | The Rising MeghalayaOctober 17, 2024

U Vice-President ka Ri India u Jagdeep Dhankhar ha ka 16 tarik u Risaw u la ong, “Ka thain Shatei Lammihngi (North East) ka don ha ka radar ka roi ka par jong ka Ri. U la ong ba ka North East ka dei ka nongnoh synniang kaba kongsan ha ka jingiatylli, ka jingkiew ha ka ioh ka kot bad ka roi ka par bad ka tynrai ka kolshor jong ka Ri.

Da kaba kubur ia ka North East kum ka bynta kaba kongsan bha jong ka Ri, u Dhankhar u la pyrto ia ka ‘Look East bad Act East Policy’ kaba la wanrah ia ka jingroi kaba khraw ha ka jingiadei, ka jingpyniasoh bad ka jingpynroi ia ki kad liengsuin hapoh ka thain.

U Dhankhar u la kyntu ia ki samla da kaba khot ia ki, ki nongnoh synniang ba kongsan tam bad ki nongshim bynta ba kongsan tam ha ka jingiaid lynti jong ka Ri India kum ka ri kaba la kiew shaphrang kat haduh u snem 2047.

Haba kren ha ka jingialang buh ia u Mawnongrim jong ka Meghalaya Skill and Innovation Hub ha Shillong ha ka jingdonlang u Lat ka Jylla u CH Vijayashankar bad u Myntri Rangbah ka Jylla Conrad K Sangma, u Vice President u la pynpaw ba ka jingtbit kam dei kaba lap ne kaba la thaw thymmai, ha ka jingshisha ka dei ka jingpyndonkam kaba bha tam ia ka sap jong u briew ha kaba ka phang ba la kdew ka pynkup ia ka jinglong kaba thymmai.

Ula pyntip ruh ba na ka liang ka Sorkar Pdeng kala mang haduh T.60 hajar klur ban pynroi ia ka sap jong ki 5 lak ngut ki samla ha kine ki 5 snem ban wan hapoh ka Ri, da kaba bynrap ruh ba ki thain nongkyndong bad ki sor rit sor ki dei ban long ki jaka pdeng jong ki jaka aijinghikai pyntbit.

Halor ka jingshem jong u ha Meghalaya, u Vice President u la ong, “Lada don ka bneng ka dei ha India, lada don ka mynsiem bneng ka dei ha Meghalaya. U la pynskhem ruh ba ka enjin jong ka ioh ka kot ka Meghalaya kan iaid tang lyngba ka kam jngohkai pyrthei. U la bynrap ruh ba ka mariang ka la ai sngewbha shibun ia ka Meghalaya abd kyntu ba kin pyndonkam pura ia ka lyngba ki briew kiba tbit bad shemphang.

Kiwei pat kiba la ia don lang ha kane ka jingialang ki kynthup ruh ia ka Dr Ampareen Lyngdoh, Myntri ka Tnat ka koit ka khiah,

Rakkam Sangma Myntri ka Tnad pule puthi, AL Hek Myntri ka Tnad Animal Husbandry and Veterinary, Donald Phillips Wahlang, Chief Secretary ka Sorkar Meghalaya lem bad kiwei pat ki heh sorkar.