La san snem ym pat ïeng ki entry exit point hap byrngem ïakhih biang ka FKJGP

Syllad | The Rising MeghalayaApril 17, 2019

SHILLONG: Ka Federation of Khasi Jaintia & Garo People (FKJGP) ka la rai ban ai por haduh 31 tarik u bnai Jymmang mynta u snem ia ka sorkar jylla ban pynieng ia ki entry-exit points ne ki khyrdop ban khmih ia ka jingrung jing mih jong ki briew sha ka jylla ne mad ia ki jingiakhih kiba tyngeh.

Ka Seng ka la shim ia kane ka rai ha ka jingialang jong ka Central Executive Committee ha ka ophis treikam jong ka ha Mawlai Motsyiar ia kaba la pyniaid da u President ka Seng Kmie Welbert Rani.

Haba iakren bad ki lad pathai khubor hadien ka jingialang u Bah Rani u la iathuh ba ka Seng kan sa iasyllok bad ki nongialam jong ki 12 tylli kiwei pat ki sengbhalang kiba dawa ia ki lad ki lynti kumno ban tehlakam ia ka jingrung kyrthep ki mynder sha ka ka Jylla khnang ban shim ia ka rai monlang halor kane ka ishu.

Kumba yn shu pynkynmaw, ka FKGJP lem bad ki 12 tylli ki sengbhalang kiba kynthup ia ka Khasi Students Union (KSU) ki la pynlong ia ka jingiakhih kaba tyngeh kiba kynthup ia ka jingpakhang shnong bad ka jingpakhang surok por mynmiet ha u snem 2013 kaba la neh da ki ar lai bnai ban dawa ia ka jingpyntreikam noh ia ka Inner Line Permit (ILP) ha ka jylla khnang ban teh lakam ia ka jingrung kyrthep ki mynder sha ka jylla.

Hynrei kine ki sengbhalang ki la pdiang noh ia ka jingpyntreikam jong ki entry exit point kumba la tyrwa da ka Sorkar Jylla ha ka jingialam jong u Dr. Mukul Sangma kum u Chief Minister ka jylla ha ka jingiakren bala pynlong ha u snem 2013 tangba san tylli ki snem ki la leit ki entry exit point kim pat ieng satia bad ka jingrung jingmih ki mynder sha ka jylla ka dang long kaba laitlan.

Mynta ka seng Hynniewtrep Youth Council (HYC), CoMSO lem bad kiwei pat ki sengbhalang ki dang ia dawa tyngeh ia ka jingpyntreikam beit jong ka Inner Line Permit ha ka jylla namar ka long ka ain kaba pyrkhing bha ban tehlakam ia ka jingrung jingmih  ki mynder.