La pynskhem iaki nongkitkam ka Synjuk Waheh Shnong Ri Jaintia, bat biang Arminius Lipon kum u president

Syllad | The Rising MeghalayaJune 9, 2024

Ka Synjuk Waheh Shnong Ri Jaintia haka 8 tarik Jylliew kala pynlong iaka jingialang pynskhem iaki nongkitkam na ka bynta ka samoi treikam jong u snem 2024-2027 haka jingdonlang u Myntri ka sorkar Jylla u Ma Kyrmen Shylla.

Ia kane ka jingialang la pynlong ha District Library Auditorium Mynthong, Jowai.

Nalor u Myntri la donlang ruh u EM incharge Political JHADC Ma Finelyness Bareh, u Dolloi Elaka Jowai Ma Puramon Kynjing, u BDO ka Thadlaskein C&RD Block Ma Brightstar Chyrmang bad BDO Namdong C&RD Block Dr. Heimonmi Niang kiba la shah khot kyrpang ha kane ka sngi.

U President ka Synjuk bad Waheh Shnong Pynthorlangtein Ma Arminius Lipon ula iathuh iaka histori ka jingiaid lynti jong ka synjuk naduh ba la seng iaka ha u snem 2011 halor ka thong ban iada iaka iap ka im jong ka jaitbynriew, ban pynim pynneh pynsah iaki dong ki Shnong khamtam haki jaka khappud bad kiwei.

U Ma Kyrmen Shylla kum u kongsan haka jingkren ula kyntu ia baroh ki Waheh Shnong kim dei ban shah pyniaid ne shah banbor ha ki MP, MLA ne MDC halor ki kam shnong kam thaw bad n atrei daka mon laitluid ban myntoi u nongshong shnong.

U Ma ula ong ruh ba ki nongmihkhmat paidbah kumjuh ki Waheh shnong ki don ka bynta ka khraw haka imlang sahlang bad ula kyntu ban don ka jingiatreilang khnang ban kyntiew iaka roi ka par bad ka jingmyntoi jong u paidbah.

Ula ong haka jingiaid lynti jong ka jingim, ka jingbha bad ka jingsniew ka ïaid ryngkat ryngkat hynrei ka shong pat ha u/ka kumno ban pyndonkam iaka, da kaba ai nuksa iaka Wah Myntdu bad ka kam tih dewīong.

Ula ong ka wah Myntdu shisien peit ka um kala kylla jakhlia hynrei lada phai sha ka jingbha jong ka, kala ai jingmyntoi iaki nongrep, ki nongkhwai dohkha bad kiwei kiwei, kumjuh ruh ka jingsniew jingbha ba mih na kam tih dewiong da kaba ula ai nuksa iaka jingmih u Dr Kampher Pala kumjuh ma u (Kyrmen Shylla) dei lyngba ki krem dewiong.

Hynrei ula kyntu pat ba haba trei ba ktah dei ban pyndonkam da kaba phikir khnang ban ym ktah iaka mariang bad ka pateng ban wan.

Ki nongkitkam jong ka Synjuk Waheh Shnong Ri Jaintia:

U Ma Arminius Lipon Waheh shnong Pynthorlangteiñ kum u President, Ma Kampher Pohlong waheh Shnong Amlarem kum u General Secretary, Tellme Phawa Waheh Shnong Sabahmuswang kum u Finance Secretary bad u Damon Dkhar Waheh Shnong Modop Nartiang kum Publicity Secretary.

La jied ruh iaki Life Member jong ka Synjuk ba kynthup ia u Ma Bishar Shylla Treasurer, Ma Selsing Langi bad Ma Nidamon Shullet kum ki Internal Adviser jong ka synjuk.

Iaka kam Vice President la bat da ki president naki Block Unit kynthup u Ma Firmly Rymbai Khliehriat Block Unit, Ma Damian War Namdong Block Unit, Ma Ebormi Pale Thadlaskeiñ Block Unit, Ma Twinson Rymbui Amlarem Block Unit, Ma Niawbait Ymbon Laskeiñ Block Unit bad Ma Hame Rilang Saipung Block Unit.

Ki Joint Secretary kynthup Ma Benedict Buam Amlarem Block Unit, Ma Wilbert Nongtdu Khliehriat Block Unit, Ma Arsuk Tyngkra Thadlaskeiñ Block Unit, Ma Matheus Dkhar Saipung Block Unit, Malbi Timung Namdong Block Unit bad Ma Risneilang Langstang Laskeiñ Block Unit.

Nalor kine la jied ruh ia ki Saw-phew ngut ki dkhot Executive Committee jong ka synjuk na baroh artylli ki District.

Kiwei de kiba la ai jingkren ki long u Ma Finlyness Bareh, Ma Roilak Suchiang Waheh shnong Mulieh, Ma Firmly Rymbai Waheh shnong Lakadong, u Assistant Secretary Synjuk ki Nongsynshar shnong ka Bri Hynniewtrep Bah JL. Khongshei.