La pynsangeh ka Kur Warjri iaka dorbar kur, kner jingiarap sha ki parakur ba shem lanot

Syllad | The Rising MeghalayaOctober 20, 2020

Ka seng Kur Warjri ka la noh jingïarap da ki marbam mardih, ki jain sphong bad iarap ruh ban shna iing ia kawei ka longïing jong i Meirad Thaneh Warjri ba shong basah ha Shnong Kyrdemkulai.

Ki katto katne ki rangbah kur Wajri bad ka India Every Home Crusade kila iarap ia noh synniang ia kine ki mar bam bad ki jainsphong. Hadien pat ka kur Wajri kala mang tyngka ban noh synñiang na ka bynta ban shna pynbha ïaka ïing kaba la jot.

Ka Meirad Thaneh Warjri ba shong basah Ka Meirad Thaneh Warjri ka la kem byrie la palat phew snem haduh ban da matlah syndon. U pyrsa kurim jong ka ula khlad dang katto katne bnai bad hadien kane la khlad sa ka khun khatduh bad ïehnoh khunswet ïa lai ngut ki khun, ka Aidalin Warjri bad la ki ar ngut ki para shynrang ba dang rit.

Kiwei kiwei ki khun ruh ki lah ïa poikha bad shong shnong sha ba kham pajih bad ki shem shitom ban kit ïa la ka kmie namar ba ïalade ruh ki long ki ba duk ba kyrduh bad hap beh bylla kylleng kylleng.

Ka Aidalin ba dang khat hynñiew snem ka rta ka la hap ban shimti ïaka lyngkor ban bsa la ka kmierad ba matlah bad ki arngut ki para shynrang da kaba trei bylla ha marjan shnong.

Ka jingshem lanot jong katei ka longïing ka long kaba la palat liam namar ba ka ïing kaba ki shong ki sah riehtngen haka khyndew jong ka Meghalaya Electricity Corporation Limited ruh ka la jot bad kim don lad ban maramot.

Ka Kur Warjri hapoh ka jingialam ïa u President u Bah DL Warjri, Saiñpynïar, Sunshine Warjri ha ryngkat ki dkhot rangbah, Bah Rudy Warjri bad Bah Raphael Warjri haka 19 tarik ki la leit ban sakhi ïaki kam ba la bynshet na ka bynta ban khmih ïaka bha ka miat jong ka longïing ha ryngkat u synñiang, ka kyntu kynpham bad kyrkhu kyrdoh ba kin ïa bit ïa biang.

Ka seng Kur Warjri ka la pyntip ba ïaka Dorbar Kur kaba juh pynlong shisnem kaba la thmu ban pynlong mynta u snem ha Sohryngkham la hap ban pynsangeh noh namar ka jinghiran bad pyrkhing adong haka Jylla.

Wat lada ym ïoh ban pynlong ïaka Dorbar Kur hynrei la kyntu ïaki shnat kiba don ha kylleng ka ri Khasi-Jaintia ban long kiba peitngor ïaka imlang sahlang khamtam eh ïaki parakur parajait ba kin lait na kano kano ka shitom ka jynjar.

Ka seng Kur ka pynpaw ba don ki parakur kiba la wanrah burom ba dei ban pyrto ïaki kam kiba la rasong ha ka imlang sahlang, ka long kaba sngewphieng ban tip ba ha ri Argentina ha kaba ka sorkar Jylla ka la ainam ïaka shilynter ka surok ha ka kyrteng jong u Sohblei Patrick Warjri na kadaw ki kam ba bha haka imlang sahlang.

Haka jingïakren bad u Bah Rudy Warjri la sngewthuh ba ki kam radbah jong u Sohblei Patrick Warjri kadei namar ba ula jop ban rat dyngkhong ïaki kam sniew kam smeh na kaba kyrni dih aphin (drugs)  bad ki kam awria ha shnong ha thaw.