La pyndam iaka jingthmu khang iew ha sor Jowai

Syllad | The Rising MeghalayaJanuary 9, 2022

Hadien ba ka Jowai Municipal Board (JMB) bad ka Jaintia Hills Autonomous District Council (JHADC) kila lah ban pynkhuid iaki ñiut ki ñier kiba sahkut ha ki iew ha sor Jowai, ka synjuk waheh shnong Jowai kala shim iaka rai ban pyndam shuwa iaka rai khang iew lashai ka sngi 10 tarik Kyllalyngkot.

U President Synjuk Waheh Shnong Jowai, Ma Alan Niangti ula ong “ka jingthmu ban khang iaki iew ha sor Jowai lashai ka sngi 10 tarik Kyllalyngkot la pyndam noh shuwa hadien ba ka JMB bad ka JHADC kila lum kila lang ia baroh ki ñiut kiba la lum thup ha ki lai tylli ki iew kiba kynthup Iew Seiñraij, Iew Chor (kaba pyniaid da ka CNI) bad ka Iew Shyiap (kaba pyniaid da ka Jowai Presbyterian Church) bad ka Iaw Thymme kaba pyniaid da ka JHADC.”

Ka JMB kala dep ruh ban lum iaki ñiut kiba la lumthup ha khmat DC ophis bad ha lad Thomas Jones Synod College haka 6 tarik une u bnai.

U Ma Alan ula ong ba don sa katto katne ki ñiut kiba sah ban lum na Iaw Thymme, hynrei na kaliang ka konsil kala pynthikna ban pynkynriah iaki ñiut lashai ka sngi Nyngkong.

U Ma Alan ula ong ba nakaliang ka synjuk kala ai khublei ïaka bor synshar district khamtam u Deputy Commissioner, West Jaintia Hills, ka JMB kiba la shimkhia ban iakren pynbeit ban pynjem iaka jingeh ka sor Jowai halor ki ñiut ki ñier kiba mih na ki iew ki hat bad ki ïing briew.

Ka Synjuk kala dawa na ka bor synshar district, ka sorkar khamtam ka tnad pynroi sor ban wad ki lad lynti ban pynjem ia kane ka jingeh ha kaba iadei bad ki ñiut bad ban pynioh iaka jaka kaba paka kaban neh khamslem bad kaba lait na ka jingktah iaka koit ka khiah u briew bad ka sawdong sawkun ka mariang.