La plie ïaka Lakroh Mini Hydel Project ba sdang na u snem 1990

Syllad | The Rising MeghalayaMarch 5, 2019

JOWAI: Ka Lakroh Mini Hydel Project kaba la sdang ban sorjamin bad tohkit bniah ban pynmih bording naduh u snem 1990, kala urlong  bad la plie paidbah ïaka haka sngi ba ar da u MLA ka War Jaiñtia bad u Myntri ka tnad Pule Puthi u Ma Lahkmen Rymbui.

Ha kane ka jingplie paidbah la ïadonlang u Deputy Commissioner, West Jaiñtia Hills u Ma Garod LSN Dykes, u SP West Jaiñtia Hills u Bah Lakador Syiem nalor ki engineer MeECL, MPGCL bad u paidbah nongshong shnong ka khappud India Bangladesh.

Kane ka projek bording Lakroh Mini Hydel Project la sdang ïaka jingjurip jaka bad tohkit naduh u snem 1990 da kaba MeSEB kaba tip mynta kum ka MeECL. Ha u Lber 20, 1990 u Lat barim ka Jylla u A.A. Rahim haba kren haka ïing dorbar ka Jylla ula ong, “Ka jingtohkit iaka jingtrei naka bynta ka  Lakroh Micro Hydel Project la lah ban pyndep. Kane ka projek lada lah ban pyndep kan pynmyntoi ïaki shnong ha thain nongkyndong.” Bad dei mynta u Lber 05, 2019 la lah ban plie paidbah ïaka ba kan pynbiang bording ïaki 14 tylli ki shnong ha Elaka Satpator ba hap ha khappud India Bangladesh.

Kane ka jaka pynmih bording ka MPGCL ka dei kaba shongdor T.21.43 Klur. La bei pisa naka Ministry of New and renewable Energy, Government of India (MNRE) T.6.75 klur bad ka North Eastern Council (NEC) T.5 Klur kaba duna la hap ban buria da ka tnad T.9.68 klur, la ong u Director (Generation) MePDGCL Bah K Tiewsoh. Kane ka projek pynmih bording dei kaba tip kum ka ‘Run of the River’ ne kaba ym don kam jaka pyllang um hynrei la shu den iaka um ban sam sha ka Power House. Ka don haka bynta ka wah Lakroh, hajan ka shnong Muktapur, West Jaiñtia Hills Disrtict bad ka jngai 6 KM na Muktapur.

Ha u snem 2001 jong u bnai Lber la mang pisa haka dor 11.76 core da ka MNRE bad MNRE kala ïarap pisa T. 6.75 Core bad ka NEC T.5 core. Namar ka jingrem ki kor ki bor ym shym la lah satia ban buh ar tylli ki machine ma 750 KW, ka sorkar pdeng kala bthah ia ka MeECL ban buh noh tang kawei ka machine ban pynmih bording 1500 KW bad kane la rai ha u snem 2003”, la ong shuh shuh u Bah Tiewsoh.

La shna iaka jaka pyllang um haka 40 meter ka lynter bad ka jingjrong ne ka jylliew kala kot 4.5 meter kaba lah ban pynlang iaka um 1150 litre ka um shi second. Na ka jaka tan um sha ka nala ba 800 meter ka um kan leit sha ka kynja pyllang um (forebay) ba lah ban pyndap 4 lak 50 hajar litre bad sam sha ka power house. Ka um kaba mih naka power house la phah sha ki hali ki pynthor (kaba tip kum ka tail race) ban pynbiang iaka um sha ki hali ki pynthor ban rep ban riang.

Hadien kane ka projek sam bording kala sahkut namar ka jingbym ioh NOC bad jaka shna power house bad la sdang iaka jingtrei naduh u snem 2009. La mang ban pyndep iaka projek ha u snem 2013, hynrei ki tiar kiba la thied ki don katto katne kiba sniew, hynrei ka MeSEB (MeECL) ka kyrduh pisa bad ym lah satia ban pyndep ïaka projek wat hadien bala dep ban pyllut 11 Klur eiei, iathuh u bah Tiewsoh.

Shuwa ban kut u snem 2017 la thied iaki tiar tar bad ha u November 2017 la lah ban pyndep bad la pyndait ïaki kor ki bor bad la lah ban pynmih bording. Baroh ka jinglut jingsep kala kot T.21 43 bad buria ka MePGCL 9.68 Klur.

U Bah K Tiewsoh ula ong ba ka dor pynmih bording kane ka hydel projek ka long tang T.1 tyngka 58 naia. Kane ka projek ka dei ban pyndep hapoh lai snem, hynrei la lah ban pyndep hadein 18 snem naduh u snem 2001, la ong u bah K Tiewsoh.

“Lyngba kane ka projek kan ïarap iaka jylla ha kaban kyntiew iaka pynmih bording naka 354.7 MW sha 356.2 MW bad tang kane ka projek kan injek ne ai ding 11 million unit haka shisnem,” la ong u Bah Tiewsoh.

U Ma Lahkmen Rymbui haba kren kum u kongsan ula ong “Ka MeECL kam duna shuh shuh haka jingtip jingshemphang ban maitphang ne trei kum kine ki projek, hynrei haba shna kino kino ki projek dei ban pyndep haka por kaba biang lait shah ktah na ka jingkiew dor ki mar ki mata bad ban lait na jingsahkut ka jingtrei iaki skim ne projek”.