La khihwin ka ishu ñiut Jowai, pynbna sa ka Dorbar Shnong Chutwakhu ban kyrshan iaka khangdam 36 kynta

Syllad | The Rising MeghalayaApril 25, 2022

Ka ishu ñiut jong ka Jowai mynta kala pynkhihwin syndon iaka sor Jowai baroh kawei khamtam iaki shnong kiba don ka iew ki hat bad mynta ka sngi ka Dorbar Shnong Chutwakhu kala pynbna ban khang iaka iew Iaw Chyiap 36 kynta kum ka dak ban kyrshan iaka jingkhot khangdam ka Dorbar Shnong Tympang Iawmusiang, Jowai.

Kane ka jingkhangdam kan long lashai ka sngi naduh 6 AM bad kan kut haka 6 PM jong ka Sngi Balang.

Pule | Shim ka Dorbar Shnong Tympang Iawmusiang iaka rai kaba tyngeh pynbna khangdam halor ka ñiut Jowai

Ka jingkhot khangdam ka long ban pyrshah iaka sorkar halor ka jingbymlah jong ka ban pynbiang iaka jaka theh ñiut kaba pura iaka sor Jowai, ka sorbah jong ka West Jaintia Hills District.

Pule | Khanglut ka Seinraij Jowai ia ki jaka pynieng kali 36 kynta

Nalor ka Chutwakhu, ka Ladthadlaboh, Mookyrdup, Caroline Colony, Salaroh bad kiwei kiwei ki shnong ba marjan kila ai ka jingkyrshan kaba pura ia kane ka jingkhangdam ba 36 kynta. Kala Ladthadlaboh kala phah khanglut iaki iew, dukan, bad ki skul ki ophis, kumjuh ki la khang ruh ban iaid kali hapoh u pud u ang ka shnong Ladthalaboh bad ka Seinraij Jowai kala khang lut baroh ki jaka pynieng kali ba ka pyniaid haki jaka jong ka kaba la ktah ia baroh ki shnong hapoh ka district.

Pule | Kyrshan pura ka Ladthadlaboh iaka jingkhangdam ba 36 kynta ka Iawmusiang Jowai

U Ma Philanderwell Lyngdoh, waheh shnong Chutwakhu ula ong ba ka dorbar shnong kala shong ka jingialang kyrkieh hynne ka step bad la shim iaka rai ban kyrshan ia kane jingkhot khangdam na ka bynta ban pynkhuid iaki niut na Jowai.

Ula ong ba nakaliang ka bor shnong kala rai ban khang 36 kynta iaka Iaw Chyiap, katba ki dukan hapoh shnong kin plie haka kynta khangdam.