Khanglut ka Seinraij Jowai ia ki jaka pynieng kali 36 kynta

Syllad | The Rising MeghalayaApril 25, 2022

Ka Seinraij Jowai kala shim iaka sienjam ban khang shisyndon iaki jaka pynieng kali kamai baroh kawei ka sor Jowai kum ka dak ban kyrshan iaka jingkhot khangdam ba 36 kynta ka Dorbar Shnong Tympang Iawmusiang naduh ka Sngi Ba Ar 6 AM haduh 6 Pm jong ka Sngi Balang hjaka halor ka jingsahkut ki ñiut ha Jowai.

“Baroh ki parking lot kiba pyniaid da ka Seinraij Jowai haki jaka jong ka naduh Stand Tourist Indica, Stand Sumo, Stand Ummulong, Moodymmai, Mukhla bad kiwei kiwei ki jaka pynieng kali ba kynthup Kniakhad, Madan Chadukra, stand Nangbah, Stand madan Siat Thong bad stand madan Dat Lawakor (stand war) kin khanglut 36 kynta,” la ong  u Ma OR Shallam president Seinraij bad khot wer ruh ia baroh ki nongshong shnong ka Jowai bad kiwei ki shnong ruh ban iatreilang khnang ban pynpei iaki skhor jong ka sorkar ban pynioh iaka jaka theh ñiut kaba pura iaka Jowai, ka district headquarter jong ka West Jaintia Hills District.

Pule | Kyrshan pura ka Ladthadlaboh iaka jingkhangdam ba 36 kynta ka Iawmusiang Jowai

“Ka Seinraij Jowai kala ai ka jingkyrshan kaba pura iaka jingthmu ban khang iew bad khangdam jong ka Dorbar Chnong Iawmusiang ban pyni sha ka sorkar iaka jingphiel jong ka sorkar bad ka bym don por ban peit iaka jingeh jong ka shnong Jowai,” la ong shuh shuh u ma Shallam.

Ha kum kane ka aiom shit bad aiom slap, kam dei tang ka Jowai ban mad iaka jingeh, hynrei wat ki shnong ba marjan kiba im kamai jakpoh na Jowai naduh na thain Amlarem Sub Division, Khliehtyrshi, Mukhla, Moodymmai, Nartiang, Sutnga bad kiwei kiwei kiba pyrshah bret ñiut, la ong u president ka Seinraij Jowai.

Pule | Shim ka Dorbar Shnong Tympang Iawmusiang iaka rai kaba tyngeh pynbna khangdam halor ka ñiut Jowai

U nongialam ka Seinraij Jowai, Ma OR Shallam, ula ong ka por kala ih bha ba ngin iatreilang khnang ban saindur iaka lawei ka Jowai, khamtam mynta ha satlak ka pyrthei ka iakhun mynta iaka jaboh plastic bad kiwei kiwei ki mar bym pyut ban iada iaka sawdong sawkun ka mariang bad ban lait ktah iaka koit ka khiah u khun bynriew salonsar.