La dep pynbeit ia ka tulop ki nongtrei SSA; Pan da ka jingthoh ban pynkut jingiakhih

Syllad | The Rising MeghalayaAugust 6, 2024

Ka All Meghalaya SSA Non-Teaching Staffs Association (AMSSANTSA) ka la pynpaw ba ka long kaba kloi ban pynkut noh ia ka jingiakhih shong kyllain mungor ka jong ki lada ka sorkar kan ai da ka jingthoh hadien ba ka Rationalisation Committee ka la dep pynbeit bad mynjur ia ka jingpynkiew tulop.

Haba kren sha ki lad pathai khubor hadien ka jingialang bad la khot pynlong da u Commissioner & Secretary Education u Vijay Kumar Mantri, ka President ka AMSSANTSA ka Kong Jennyfer Synrem ka la ong ba kane ka jingiakren kaba la long hynne ka sngi Nyngkong (5 tarik Nailar) ka la long kaba kham biang.

“Hynrei, ngi kwah da jingthoh, bad na kane ka daw ngim pat lah ban pynkut ia ka jingiakhih haduh mynta. Ngin bteng ia ka jingiakhih ha ka rukom kaba jai jai. Ai ba ngin ioh shwa da jingthoh na ka sorkar ia kaba ka la kular ha ngi hapoh jong une u taiew, bad hadien ngin sa weng noh ia ka jingiakhih ka jong ngi,” ka la ong.

Ka president jong ki nongtrei SSA ka la pdiang ba ka jingdawa pynkiew tulop ka jong ki kaba long  80% ka dei ka bym shong hok satia.

“Lada ngi iaid da kane ka 80%, ki katto katne na ngi kin ioh haduh T.80,000 katba kiwei pat kin ioh tang T.8000, ka bym shong nongrim satia,” ka la ong. “Ngi iakhun na ka bynta ka jingbit jingbiang jong baroh, kumta ngi hap ban pyrkhat ia iwei pa iwei ki dkhot jong ka Association,” bynrap ka President.

Hynrei, watla katta ka la ong pat ba ka Seng kam lah satia ban pdiang ia ka jingshim rai jong ka sorkar ban pynkiew ia ka tulop jong ki nongtrei Non-Teaching Staff da 25%.

Haba pynpaw halor ka jingdonkam ban pynbeit ryntih ia ka rukom treikam, ka Kong Synrem ka la ai khublei kyrpang ia ka sorkar Meghalaya halor ka jingthaw ia kane ka rationalisation commitee.