Kyrshan ka KSU Narpuh halor ka jingdawa C&RD Block ha Narpuh

Syllad | The Rising MeghalayaJune 10, 2019

KHLIEHRIAT: Ka Khasi Students’ Union (KSU) Narpuh Circle kala pynpaw ba ka ai ka jingkyrshan ba pura ia ka jingdawa ka Narpuh Border Area Joint Action Committee (NBAJAC) na u Myntri ba dei peit ia ka tnat Community & Rural Development u Ma Sniawbhalang Dhar ban pynioh noh ia ka ophis C&RD Block  ba thymmai katkum ka jingangnud ki paidbah ka thaiñ Narpuh.

Lah ban pynkynmaw ba ka KSU kala ïasnohktilang bad NBAJAC naduh ba sdang jong ka jingdawa ban pynkynriah ia ka ophis C&RD Block na Wapung sha Narpuh bad ban buh iaka kane ka ophis ha ka shnong Lumshnong.

Ka KSU ka iadon bynta ruh bad katei ka Committee ha ka jingleit ia kynduh ia u Myntri Rangbah ka jylla u Conrad K Sangma ha ka tarik 13/09/2018 bad la buh ruh ia ka jingdawa ban pynneh ia ka C&RD ha Lumshnong. Hynrei ha katei ka jingiakynduh bad u Myntri Rangbah ka jingiakren kam shym la poi shano shano namar ka jingkyrduh pisa ka sorkar jylla.

U Myntri Rangbah ha kato ka por, u ong ba u dangshu shimti thymmai ia ka shuki Myntri Rangbah, um da shai bha ha ka jingiadei bad kane ka kam bad ula kyntu ban ailad ba un pyrkhat shwa katto katne por da kaba kular ruh ban shimkhia ban bishar bniah ia kane ka jingdawa.

Mynta ka NBAJAC kala dawa bad pynkynmaw ia ka sorkar ban pynurlong ia ki jingdawa jong u paidbah ka thaiñ bad ka KSU ruh ha ka juh ka nongrim kan nym shong kli kti bad ai ka jingkyrshan kaba pura iaka NBAJAC ban iai buddien ia kane ka jingdawa haduh ba kut.

Ka thaiń Narpuh ka la donkam kyrkieh ia kane ka ophis badon kam tam namar ngi la roi ha ka jingbun briew, bad u pud u sam ba iar bad katkum ki jingdawa ka por ka Narpuh kam dei ban shu sah beit hajuh khlem kino kino ki lad jingpynroi na ka sorkar bad ka donkam ia ki jingkylla la ha ka liang ka roi ka par bad ha ka ioh ka kot, la ong u Deibormi Dkhar General Secretary KSU Narpuh Circle.

Ka KSU ka dawa na u myntri ka C&RD Block ban sngap ia ki jingdawa u paidbah nbad la kyntu ruh ia u Local MLA jong ka Sutnga Saipung Constituency Ma Shitlang Pale ban iarap  kren bad ka sorkar ha ka jingiadei bad kane ka jingdawa block ha Narpuh.