Kyrshan Dr. Jemino ki shi kynum rai kyrshan Ma Vincent u CEM barim ka JHADC

Syllad | The Rising MeghalayaMarch 19, 2019

JOWAI: Shi sngi hadien ba u Myntri jong ka tnat Transport u Ma Sniawbhalang Dhar u la pynpaw paidbah ïa ka jingkyrshan jong u Dr. Jemino Mawthoh u kyrtong monlang jong ka Meghalaya Democratic Alliance (MDA) ha kane ka MP Election bud sa u Chief Executive Member barim jong ka Jaiñtia Hills Autonomous District Council (JHADC) Ma Madonbai Rymbai ban pynpaw ia ka jingkyrshan ia u kyrtong ka Congress u Ma Vincent H Pala hynrei kum u paralok bad u briew babha ym kum  u kyrtong jong ka Congress.

Hynnin ka sngi, u Ma Sniawbhalang u la pynlong ia ka jingialang jong ki nongialam jong ka NPP na Nartiang constituency bad Jowai constituency Thadlaskein, Mukhla haba la don ryngkat u Dr. Jemino Mawthoh, u MLA ka Jowai, CEM JHADC u Bah Thombor Shiwat uba la pyniaid ia ka jingialang lem bad kiwei de ki MDC jong ka thain bad kumba 400 ngut ki nongialam jong ki tnat treikam jong ka NPP ha kitei ki artylli ki constituency.

Ha katei ka jingialang, ki shi kynum ki la kyntu kynpham ia ki nongialam bad nongkyrshan jong ki ban trei shitom khnang ban wanrah ia ka jingjop ia u Dr. Jemino uba long u kyrtong monlang jong ka MDA na ka party UDP.

Katba hynne ka nohphasingi, U Ma Madonbai Rymbai u la pynlong ia ka  jingialang ha iing jong u ha Khliehtyrchi haba kumba 300 ngut eiei ki nongkyrshan  jong u na ka constituency barim jong u kila wan iadonlang.

Ka jingialang ka iamir jingmut lang iano ban ai ka jingkyrshan bad da kawei ka sur la shim ka rai ban b kyrshan ïa u ma Vincent ha kane ka elekshon sha ka iing dorbar thawain jong ka Lok Sabha na Shillong constituency namar kum u MP u la noh synniang shibun sha ka constituency kaba u Bah Madonbai u ju mih khmat mynshwa.