Kyrmen ban kiew ka kam shna Khiew Ranei ha Tyrchang bad Lyrnai: HH Mohrmen

Syllad | The Rising MeghalayaJuly 19, 2019

JOWAI: U Rev HH Mohrmen, Secretary jong ka Society for Urban & Rural Empowerment (SURE) kaba la shimkhia ban kyntiew ïa ka kam thaw khiew khyndew ne Khiew Ranei haka shnong Lyrnai bad Tyrchang, ula ong ba ha kine ki bnai ki snem kiba la leit ki dei tang ki longkmie kiba la ïaw haka rta kiba trei ïa kane ka kam, hynrei mynta kala khring wat iaki kynthei khynnah ruh kila sdang ban hikai ban shna khiew khyndew.

U Pastor Mohrmen ula ong ba kane ka jingsdang ki thei lud bad samla ban hikai shna Khiew Ranei kala ai mynsiem bad ka don ka jingkyrmen ban kyntiew shuh shuh ia kane ka kam kaba dei kawei na ki lad kamai jakpoh.

“Mynshuwa ngi tieng ïoh ba kan duhnoh kane ka kam thawkhiew khyndew, hynrei mynta pat kala kylla namar ki samla kila ïashim bynta ha kane ka kam,” la ong u Pastor Mohrmen haba sakhi iaka jingwan iashimbynta ki kynthei samla bad khynnah haka jinghikai shna khiew khyndew kaba la kyrshan pisa ka North East Cultural Centre, jong ka sorkar India kaba don ha Dimapur ha ryngkat ka jingïatreilang jong ka ophis jong ka Art and Culture ka sorkar Meghalaya kaba la pynlong haka 15 tarik haduh ka 19 tarik u July 2019 ha Lumdiengiang jong ka shnong Tyrchang.

Ïa kane ka jingai jinghikai la pynlong hapoh ka skhim ‘Ek Bharat Shreshtrha Bharat’ jong ka sorkar India.

Palat lai phew ngut ki longkmie bad ki samla kynthei kila wan ban ïashim bynta ha kane ka jingai jinghikai bad namar ba kane ka dei ka kam kaba ki trai shnong kila ïoh pateng naki kpa tymmen jong ki, ki nongai jinghikai ruh ki dei ki nongthaw khiew ba pawkhmat jong kane ka shnong kiba la im ja da kaba thaw ïa kine ki Khiew Ranei. Ki lai ngut ki longkmie kiba la ai jinghikai ki dei ka kong Milda Shylla, ka kong Ïoophi Shylla bad ka kong Manbha kiba long ki nongïalam jong ka kam thawkhiew ha kane ka shnong.