Kyntu u MLA South Shillong ban shna thymmai ia baroh ki surok PWD hapoh ka constituency

Syllad | The Rising MeghalayaMay 22, 2024

U MLA ka BJP na South Shillong u Bah Sanbor Shullai u la buh ka jingkyrpad ia ka sorkar Jylla ba kan shna pynthymmai noh ia baroh ki surok PWD kiba don hapoh ka constituency ka jong u.

Ha ka memorandum sha u Symbud Myntri Rangbah ka Jylla uba khmih ia ka Tnat PWD (Roads) u Bah Prestone Tynsong, u Bah Shullai u la ong, “Nga kyntu ia phi ba phin shimkhia lem ban pdiang ia kane ka jingkyrpad ban shna pynthymmai lut ia baroh ki surok PWD kiba hap hapoh ka 19th South Shillong constituency.”

U la ong ba baroh ki surok barim ka PWD kiba hap hapoh ki jaka Municiapl jong ka constituency jong u ki dei kiba la shu bteng ban maramot na ka por sha ka por mynta la bun bun snem. Ka la don ka jingkiew ha ka jingdon jong ki homestay na ka bynta ki nongwan shangkai pyrthei, ki lodge bad ki guest house hapoh ka constituency.

Nalor kata u la ong ruh ba da ka jingwan jong ki project ba la pynkhreh kum ka Ropeway na Shillong peak view poin sha Madan Laban (Raid Laban) bad kiwei ki surok kiba pyniasoh hapoh ka South Shillong, ka constituency kan sa lah ban kyntiew ia ki kam jngaohkai ka ban sa iarap shibun ban pynduna ia ka jingkhapngiah ha ka nongbah Shillong.