Kyntu u DC West Jaintia Hills ban pyndonkam helmet bad seat belt na ka bynta ka jingshngain ha ki surok

Syllad | The Rising MeghalayaMarch 1, 2024

U Deputy Commissioner bad Chairman ka District Level Road Safety Committee, West Jaintia Hills District, Jowai u la pynbna halor ki lad jingiada ban lait na ki jingmynsaw ba jur haba jia ki jingjia tyngkhuh kali bad na ka bynta ka jingshngain ha ki lynti surok da kaba kyntu ia ki nongniah ar shaka bad ia kiba shong lang ba ki dei ban pyndonkam ia ki helmet bad kumjuh kiba shong ha ki kali ba kin deng ia ki seat belt na ka bynta ka jingshngain ka jong ki hi.

Shi bynta ban pynsngewthuh ha kaba iadei bad kane ka bynta, na ka liang ka District Level Safety Committee kan pynlong ruh ia ka jingpynshai paidbah ha Wahiajer/ Ummulong ha ka 4 tarik, ha Amlarem 5, ha Iawmusiang, Jowai ha ka 6.

Katba ha ka 7 tarik ka District Level Road Safety Committee kan pynlong ruh ia ka mobile camp bad special drive ha ka surok Jowai By pass, Khliehtyrshi ban jurip ia kino kino ki jingpynthaba ba pyndait na shadien jong ki kali ban lait na ka jingiatyngkhuh, bad ha k 8 tarik yn pynlong ia ka Mobile camp ha Mihmyntdu hajan ophis DTO ban jurip halor ka jingpyndonkam ia ki seat belt, helmet bad kiwei.

Nalor kata la kdew ruh ba kino kino ki jingpynkhein ain hadien ba la pynlong ia kine ki jingpynshai paidbah kin shah pynngat ha ki kyndon ain Motor Vehicle (Amendment) Act, 2019.