Kyntu u Conrad ia ki paidbah ha Killing ban aijingkyrshan ia ka Kong Ampareen ha kane ka MP Election

Syllad | The Rising MeghalayaApril 14, 2024

U National President ka Seng NPP uba dei ruh u Myntri Rangbah ka Jylla ha ka 13 tarik mynta u bnai u la hiar leit ialap ilekshon sha ka shnong Killing kaba hap hapoh Jirang constituency, Ri Bhoi District ha kaba u la kyntu ia ki paidbah kane ka thain ba kin ai ka jingkyrshan kaba pura ia ka kyrtong jong ka party NPP ka Kong Ampareen Lyngdoh ha kane ka Lok Sabha ilekshon na Shillong Parliamentary Constituency ka ban long ha ka 19 tarik mynta u bnai.

Haba kren halor ki party sain pyrthei kiba pyniapait iapra ia ka imlang ka sahlang lyngba ka jingsngew iapher jaidbynriew, u Conrad u la ong ba kane ka ilekshon kaba mynta ka long kaba kongsan bha na ka bynta ban iada ia ka synshar paidbah bad ban iakhun pyrshah ia ki bor kiba pyrshang ban wanrah ia ka jingiapait iapra.

Da kaba kyntu ia ki paidbah ba kin ai ka jingkyrshan kaba pura ia ka kong Ampareen Lyngdoh, une u khliehduh ka NPP u la ong ka long kaba donkam na ka bynta ban jied ia ka MP na ka party synshar bad ka ban don ia ka bynta hapoh Delhi khnang ban lah ban wanrah ia ki kam pynroi hapoh kane ka Jylla.

Shibynta jong kane ka prokram, na ka liang u Conrad Sangma u la pdiang sngewbha ruh ia u Sunmoon Marak lem bad ki nongkyrshan jong u sha ka party.

U Sunmoon Marak u dei uba la ia aireng ha ka ilekshon Assembly kaba la dep na ka party TMC napoh Jirang constituency.