Kyntu u Bah Pala ia ki nongkyrshan party riewlum ban vote ia ka Congress, ka jingialeh kalong pyrshah ia ka BJP

Syllad | The Rising MeghalayaApril 16, 2024

U nongialam ka Seng Congress uba dei ruh u MP na Shillong u Bah Vincent H Pala ha ka 15 tarik Iaiong, u la kyntu ia ki nongkyrshan jong ki party riewlum bapher bapher ba kin iatylli lang kawei ban vote ia ka Congress namar dei tang kane ka party kaba lah ban iakhun pyrshah ia ka BJP hapoh Delhi.

“Nga kyntu ia ki nongkyrshan jong ka National People’s Party (NPP), Voice of the People Party (VPP) United Democratic Party (UDP) bad ka Hill State People’s Democratic Party (HSPDP) ba kin iatylli lang kawei ban aijingkyrshan ia ka Congress kaba lah ban iakhun pyrshah ia ka BJP,” ong u Bah Pala ha ka jingkren ialap ilekshon ha Jowai, West Jaintia Hills District.

“Ym donkam ban kyrshan ia ka NPP, VPP lane ka RDA namar ha ka jaka ban iakhun pyrshah ia ka BJP, ka kut pynban ha kaba ialeh pyrshah markylliang. Kumta ngi dei ban iatylli lang kawei bad ngim dei ban ia pharia.Phi lah ban leh ia kata ha ka ilekshon MLA bad MDC hynrei na ka bynta ka MP phi dei ban vote tang ia ka Congress,” u la bynrap.

U la ong ruh ba ka BJP ka la pyndonkam bakla ia ka bor da kaba byrthen ia ki nongialam jong ki party sain pyrthei bapher bapher lyngba ka CBI, ED ba kiwei kiwei bad kynnoh ruh ba ka la ioh ban lum haduh kumba T.6,000 klur lyngba kane.

“Ki paidbah ki don ia ka bor ban pynrem ia ka BJP lyngba ka jingiatylli bad iatreilang na ka bynta ka Congress,” u la ong.

Nalor kata une u MP ka Congress u maham ruh ba ka jingthmu jong ka BJP ban mynjur ia ka Unifrom Civil Code (UCC) kan ktah jur ia ka Jylla Meghalaya kaba ai ia ka jait ka khong sha ki kynthei.

“Ka UCC kan ktah ia ka rukom ai jait ka jong ngi sha ka kynthei.Kan ktah jur ia ngi namar ngi shim jait na ka kmie,” u la ong da kaba bynrap ruh ba ka UCC kan ktah ia ka jinglong tynrai bad ia ka kolshor jong ki trai shnong riewlum ka Jylla.

Da kaba pynpaw ba ka don da ka rukom pyniaid ne system hapoh parliament, u Bah Pala u la ong ba tang 13 sekhon la mang ia uwei pa kawei napdeng ki 543 ngut ki MP hapoh Lok Sabha ba kin kren. “Kumta ngi la tip bha ia ka system bad kan long ka bym don jingmut ban phah da ki kyrtong na ki party riewlum,” ong shuh shuh une u heh Congress.

Haba kyntait ia ki jingkynnoh ba u la shu iohthiah ha kine ki 15 tylli ki snem kum u MP, u Bah Pala u la ong, “Ka jingshisha hi ka long ba Nga dei uwei napdeng ki MP kiba trei shitom napoh ka thain.Kiba bun na ki MP na ka thain shatei lammihngi (North East) ki la pynpaw ba Nga dei ban jop biang sa shisien pat namar ki tip haduh katno Nga la trei shitom. Dei namar kane ba ki 39 ngut ki MP ki la jied ia nga kum u Secretary General jong ka North East MPs’ Forum.”

Nalor kata u la ong ruh ba ka thain Rilum Jaintia ka la shah iehnoh bein ha ka sorkar bad ong, “Ka kyrteng jong ngi ka la jah rngai na ka State Anthem.” Nalor kata u la pynthikna ruh ban iai buddien halor ka jingdawa ban kynthup ia ka Ktien Khasi hapoh ka Khyrnit ba Phra jong ka Riti synshar jong ka Ri India.

Shuh shuh u Bah Pala u pynthikna ruh ba lada ka Congress kan wan ha ka bor kan kyntiew ia ka jingsiew na ka bynta ki nongtrei job card lyngba ka  skhim MGNREGS na ka T.238 sha ka T.400 shi sngi bad ka jingmang kaba T.10 klur ka corpus fund (ka bhah kyrpang) sha baroh ki district khnang ban lah ban weng ia ki jingeh bapher bapher hapoh ki district jong ka jylla.