Kyntu ka VPP ia u EE-PWD Khliehriat Division ban phah maramot noh mardor ia ka surok DSSMHR

Syllad | The Rising MeghalayaSeptember 25, 2024

Ka seng Voice of People Party (VPP) ha ka 25 tarik Nailur ka la leit ban ai da ka jingthoh sha u Executive Engineer PWD (Roads) Khliehriat Division, East Jaintia Hills ban kyrpad na ka bynta ban phah shna pynbha ne maramot noh mardor ia ka surok Dkhiah Sutnga Saipung Moulsei Halflong Road (DSSMHR) kaba la sniew dur sha ba palat pud bad wanrah jingeh shibun ia ki paidbah nongshong shnong jong ka thain mynta la bun bun snem.

Ka seng ha u kyrwoh lyngba u Damewanhi L. Rymbai, Organizing Secretary ka la ong ba kane ka surok ka dei u thied snam ba kongsan bha namar ka dei kaba pyniasoh ia ka headquarter ka district bad kiwei ki shnong kiba hap hapoh ka 5 Sutnga Saipung Constituency, bad lyngba kane ka surok ki paidbah ki ioh shibun ki jingmyntoi.

Hynrei, mynta la slem bah la shu iehnoh bein ia kane ka surok kaba la jubor khamtam naduh ka shnong Sutnga shaduh Saipung, Moulsei, Halflong khlem da don ki nongpeit nongkhmih bad kaba la pynlong ia ki nongshnong shnong ba kin ngat ha ka sohsat bad ha kiba bun rukom ha ka jingim kaba man la ka sngi.

Kumba ka long mynta ki nongshong shnong ki mad jingeh khamtam ban leit sha ki jaka sumar ne shim dawai dashin shapoh Khliehriat namar ka jingsniew jong kane ka surok khamtam lei lei kiba pang ba shitom bad ki longkmie armet ha kaba ki don ruh ki khep ba ki longkmie ki hap ban kha hapoh kali namar kim lah ban poi shuh sha ki jaka sumar.

Une u nongialam ka VPP u la ong ruh ba kane ka jngsniew ka surok ka la ktah jur ruh ia ki khynnah skul kiba pule ha sor Khliehriat kiba dei na kine ki thain, kumjuh ruh ia ki briew kiba leit trei ophis ne kiwei pat ki jingtreikam, kata kum sha C&RD Block Saipung, Saipung PHC, Saipung Police Station bad kiwei de ki ophis bapher bapher.

“Ka jingsniew jong kane ka surok ka la ktah jur ruh ia ka roi ka par jong ki shnong ki thaw jong ngi bad ia ka district hi baroh kawei namar ba ki briew sha kine ki thain ki im ha ka rep ka riang. Hynrei namar ka jingsniew surok ka wanrah ka jingshitom ha ka ban shalan ne die ia ki mar rep sha ki iew ki har kiba don ha sor Khliehriat bad kiwei pat ki jaka. Ki nongrep kim lah ban shalan ne die ia ki mar rep ha ka por ba biang namar bym don ki kali ba nud ban kamai bad namar dor bai kali ka long kaba rem bha namar ka jingsniew u surok,” u la ong.

Ha kajuh ka por u kyrpad jur ruh ia ka sorkar ba kan shimkhia da kaba mang pisa na ka bynta ban maramot ia kane ka surok bad kyrpad ruh ia ka MLA ka thain ka Kong Santa Mary Shylla kaba la iai kren na ka por sha ka por ia kane ka kam ba kan shimkhia ban banbor ia ka sorkar khnang ban lah ban pynurlong noh kham kloi ia kane ka jingangnud jong ki paidbah ka thain.