Kynthoh ka NPP ia ka politik pyniashun briew ka VPP, dawa tuklar na ka ECI ba pynthut ialap ilekshon

Syllad | The Rising MeghalayaApril 10, 2024

Ka National People’s Party (NPP) ha ka 9 tarik Iaiong, ka la kynthoh tyngeh ia ka Seng liang pyrshah Voice of the People Party (VPP) halor ka jingpynphriang ia ka kam politik jong ka jingiashun briew hapoh ka thain Ri Lum Khasi bad Jaintia, kata namar kam shym la lah ban pynkohnguh ia ki paidbah lyngba ki jingkular ba thylli jong ka.

Kane ka la wan long ruh shi sngi hadien ba ki nongpynthuh kiba pyrta ha u Prah, ki la leit ban pynthut ia ka jingialang ialap ilekshon jong ka seng NPP kaba la long ha Umsning, Ri Bhoi district, ha Mairang, Eastern West Khasi Hills, ha Jaiaw bad ha Rynjah ha ka nongbah Shillong.

U nongaiktien ka NPP u Bah Himalaya M Shangpliang lyngba une u kyrwoh ba la pyllait haka 9 tarik Iaiong u la ong, “Ngi pynrem jur ia ka jingleh jong ki nongkyrshan ka VPP ban pynthut ia ki jingialap ilekshon bad halor ka jingpynmih ia ki ktien khlem akor pyrshah ia ka kyrtong jong ngi.”

U la ong ruh ba na ka liang ka party ka la dawa na ka Election Commission of India (ECI) ba kan tuklar mardor pyrshah ia ki nongialam ka VPP namar ka jingpynthut ia ki jingialap ilekshon jong ka NPP.

“Kane ka pyni shai ba ka VPP ka la klumat jingmut namar ka jingduna ka jingkyrshan jong ki paidbah. Ka VPP kam shym la lah ban pynkohnguh i ki paidbah lyngba ki jingkular ba thylli jong ka. Kumta, ka la shim da ki sienjam ban thaw jingklumar, ban pynthut ia ki jingialang ialap ilekshon jong ka NPP,” ong u Bah Shangpliang.

“Ka jingjia hynnin ka sngi ka pynpaw shai ba ka VPP ka sngewthuh ba ki jingkynnoh ki jong ki kim shym la treikam pyrshah ia ka NPP, bad dei na kata ka daw ki la pyrshang ban shu pyni bor pyrshah ia ngi. U nongialam ka NPP na Mawryngkneng u Bah Pyniaid Sing Syiem u la kren ia kaba dei ba ka VPP ka pyrshang ban wanrah da u khniang jingpang ne virus na West Bengal ha kane ka ilekshon namar kine ki jingjia ki pynshisha ba kim lah shuh ban buhrieh ia ki jingshisha ba ka dei ka Team B jong ka seng TMC,” ong u nongaiktien ka NPP.

Nalor kata une u heh ka NPP u la dawa ruh ba dei ban shim ka jingpynshitom pyrshah ia ka VPP namar ka jingpynthut ia ki jingialap ilekshon jong kiwei pat ki party sain pyrthei kaba dei ka jingpynkhein ia ki kyndon ba la kdew da ka ECI na ka bynta ka jingpynlong ia ka ilekshon kaba iaid beit iaid ryntih.

U la ong ruh ba ka NPP kan sa ujor pyrsha ia ki nongialam jong ka VPP namar ki dei ban shim ia ka jingkitkhlieh kaba pura lada jia ba mih kino kino ki jingklumar kiba pynthut ia ka shongsuk shongsain.

“Ka long ruh kaba sngew bynniaw ba kine ki dei ki juh ki briew kiba ialap halor ka kam politik kaba khuid hynrei ki jingleh ki jong ki pat ki long da kumwei,” U Bah Ardent u dei ban leh ia kaei kaba u ialap bad ban sangeh ban ialam bakla ia ki briew kiba im ha ka suk ka sain lyngba ki buit politic ba arsap jong u,” ong shuh shuh u Bah Shangpliang.