Kyntait u James Sangma ba thmu iakhun ha ka ilekshon shiteng samoi na Gambegre

Syllad | The Rising MeghalayaJune 29, 2024

U nongialam ka National People’s Party (NPP) uba dei ruh u Myntri sorkar barim u James K Sangma u la ong ba um don satia kano kano ka jingthmu ban ia aireng ha ka ilekshon shiteng samoi ka ban wan na Gambegre constituency.

Haba pynpaw lyngba u kyrwoh ha ka 29 tarik Jylliew, u Sangma u la ong, “Ban pynshai bad pynkut noh shisyndon ia kane ka bynta: Ngam don satia ia kano kano ka jingthmu ban iakhun ha kane ka ilekshon shiteng samoi na Gambegre.”

U la ong ruh ba ha ka jingialang jong ka party kumjuh ha ki jingiakren kiba hapoh, u la pynshai ruh ia ka nongrim ka jong u.

U James u la pynpaw ia kane hadien ki khubor kiba kynnoh ba ka la don ka jingiapait hapoh ka party bad ha ka longiing jong u ha kaba iadei bad ka jingai tiket na ka bynta kane ka ilekshon na Gambegre.

Haba pynpaw ka jingsngewkhia halor ki jingai jingtip kiba ialam bakla halor kane ka phang, u Sangma u la ong, “Ka long ka jinglehrain ban iohi kumno ba ki lad pathai khubor, katta katto katne kiba la jan kynjoh sha ka 80 snem bad ba la ialam da ka nongthoh khubor kaba pawkhmat bha kan pynmih ia ka jingthoh ha ka sla khmat bad ha ki social media khlem da pynthikna bad pynshai nongno ki la ioh ia ka tyllong khubor.”

Nalor kata u la ong ruh ba ym shym la don satia kino kino ki ban phone sha u ban kylli halor kane ka phang, hynrei ka long kaba kyndit ban iohi ia ka jingpynmih ia ka khubor kaba ialam bakla da katei ka kotkhubor da kaba pynshong nongrim tang lyngba ki khubor hamsaia.