Kyntait u Conrad ba don jingiapait ha ka party ne ha ka iing jong u halor ka ilekshon shiteng samoi na Gambegre

Syllad | The Rising MeghalayaJune 28, 2024

U National President ka National People’s Party (NPP) uba dei ruh u Myntri Rangbah ka Jylla u Conrad K Sangma u la kyntait mardor ba ka don kano kano ka jingiapher jingmut ne ka jingiapait hapoh jong ka party ne ka longiing jong u ha kaba iadei bad ka ilekshon shiteng samoi  na ka bynta ka Gambegre Assembly seat.

Haba kren sha ki lad pathai khubor ha ka 28 tarik Jylliew, u Conrad u la ong ba kam shym la don satia kano kano ka jingiapher jingmut ne ka jingiapait ha ka party ne hapoh ka longiing jong u.

Kane ka jingkren ka jong u ka la wan long shibynta ban jubab halor ki jingkynnoh ba u hymmen jong u, u James Sangma uba kwah ban iakhun kum ia kane ka ilekshon shiteng samoi u la pynpaw ia ka jingsngewsih halor ka jingthmu ban ai tiket ia ka kurim jong u Myntri Rangbah ka Mehtab Chandee Sangma.

Haba kyntait ia kane ka jingkynnoh, u Conrad u la ong ba ki don haduh 7-8 ngut ki kyrteng kiba la mih paw bad kiba la iaid mynta katto katne por ha kaba u la dep ban iakren lut ia ki baroh. “Ha ka jingshisha dang ha kine ki khyndiat sngi ba la dep ngi la iakynduh lang ha ka jingialang, baroh baroh kynthup ia ki nongialam kiba kwah ban iakhun bad ki kyrteng jong ki briew kiba la iaid watla kim shym la kwah ban iakhun ne kwah iakhun ia kane ka ilekshon kata ka dei da kawei pat ka mat, hynrei ki kyrteng jong ki, ki la paw bad iaid shakhmat,” u la ong.

Nalor kata u la ong,”La ki dei ki kyrteng jongno jongno ruh, ngi la iakren bad baroh, bad baroh hi ki la pynthikna ba ki don ryngkat bad ka party bad kaei kaba ka party ka rai kata hi kan dei ka jingshim rai kaba khatduh bad kin pdiang sngewbha ia kata ka rai.”

“Kumta ka party ka la shim ia ka rai da ka jingiamynjur lang ha kaba iadei bad kane ka mat bad mynta ka sienjam ka long ban ai ia ka kaiphot naduh ki block level, ki district level bad ki regional level bad hadien ba la pyndep ka State Committee kan sa phah ia ka jingtyrwa,” u la bynrap.

Kumjuh ruh une u nongialam ka NPP u la ong,”Shah Ngan pynshai sa shisien ba kam don satia kano kano ka jingiapait iapra. Ka long kaba shai kdar ba ngin iatreilang kum ka iing bad kham kongsan ruh kum ka party sain pyrthei bad baroh ki kyrteng kiba la iaid kin iatreilang ha ka jingiakhun ia kane ka ilekshon.”

Shuh shuh u la ong, “Ki la don 7-8 ngut ki kyrteng kiba la iaid hynrei kam mut satia ba baroh ki la mih shakhmat ban ialap, hynrei ki paidbah ki la sei ia ki kyrteng jong ki bad kumta baroh kito ki briew kiba ngi la iakren baroh hi ki la pynthikna ba kin pdiang beit ia ka rai jong ka party.”