Kyntait ka shnong bad kiba haïing ban shimti iaka metiap u I Love You ym don ba kam iaka met u Marsanki Tariang

Syllad | The Rising MeghalayaSeptember 12, 2022

Ka shnong Moorap bad kiba haiing hasem u I Love You Talang kila kyntait mardor ban shimti iaka metiap jong u na jaka buh metiap ha Jowai Civil Hospital, Ialong.

Kane ka jingkyntait ka shnong bad longiing u I Love You ka long ba kim lah ban pdiang iaki kam kiba ula leh. Kane ka rai ka iing ka sem u I Love You kala shim naduh ka 3 tarik une u bnai haka jingmih paidbah ban pyrshah ka shnong Moorap iaki kam pyniap briew kaba ula shah kynnoh donkti ban pyniap ia u Damehipaia Papeng bad u Fullmoon Kharsahnoh ki ar ngut ki nongniah kali kaba la jia ha u bnai Nailar jong une u snem.

U I Love You u dei uwei na ki saw ngut ngut kiba lait phet na Jowai district jail kaba la jia haka sngi Saitjain ka taiew bala dep kiba la shah bom iap haka Sngi U Blei ha ka thain Thadmuthlong Shangpung. Katba ka metiap u Marsanki Tariang uba la shah rai pynrem haka kam pyniap briew ym don satia mano mano ba wan kam iaka metiap jong u. U Marsanki Tariang u dei u khun jong u Nowell Passah kiba na ka shnong Priang.

Ka ophis u Superintendent of Police West Jaintia Hills District kala kyntu ia kino kino kiba don jingtip shaphang u Marsanki ban wan shakhmat hapoh 2 sngi lane da kaba phone ha u Addl. Superintendent Of Police: 7005686668, Dy. Superintendent Of Police (Crime): 8132097333, O/C Jowai Police Station: 98630-66563,Jowai Pcr No: 9774065467/ 03652220782.

La ong ba lada ym don mano mano ba kam iaka metiap hapoh ka por kaba la buh, yn pynkhuid iaka met katkum ka kyndon jong ka aiñ.

Ka metiap jong kine ki ar ngut kynthup ia ka jong u Lodestar Tang bad Shidorki Dkhar ki don ha jaka buh metiap ha Civil Hospital Ialong.

“Ki ba haïing ki la wan peit ithuh ïa ka met ïap u I Love You katkum ka jingbthah jong ki bor ka aiñ bad ki la ong ïa ki pulit ba kim treh ban shimti ïa ka met iap jong u I Love You, la ong u Waheh Shnong u Ma Stanly Ryngkhlem haba kren bad u nongai khubor.

Shuh shuh, ula ong ka Dorbar Shnong Moorap ka la rai ban kyrshan ïa kane ka rai jong ki kmie ki kpa u I Love You bad ka shnong kan nym shah ban rung ka met ïap u I Love You sha shnong.

“Naduh ba sdang paw pyrthei hi u I Love You ka Dorbar shnong Moorap ka la rai pynrem ïa u namar ki kam pyntriem jong u haka imlang sahlang”, la ong u shuh shuh u Ma Stanly Ryngkhlem. Ula bynrap halor kane ka nongrim ka Dorbar shnong kala rai ban nym pdiang ïa u, wat lada um don shuh ha sla pyrthei.