Kyntait ka iingdorbar ia ka Bill ka VPP ban bhah kyrpang ia ki ST ba duk ha ka Reservation Policy

Syllad | The Rising MeghalayaAugust 28, 2024

Ka Iingdorbar Thaw ain ka ka Jylla haka 27 tarik Nailar ka la kyntait ban pdiang ia ka Meghalaya Reservation for Non-Creamy Layer of Scheduled Tribes (in State Reservation Policy) Bill, 2024 ba la tyrwa da u MLA ka VPP ka North Shillong u Bah Adelbert Nongrum.

“Ki dkhot kiba kyntait (No’s) ki la jop bad ym lah ban pyniaid shakhmat ia ka motion bad ym shym la wanrah ia ka Bill. Kumta ia kane ka Bill la kyntait da ka iingdorbar,” pynsngew u Symbud Lamphang u Timothy D Shira hadien ba la pynlong da ka jingia vote halor kane ka Bill ha kaba kiba kyntait ki la ioh ia ka jingbun paid.

Haba rah ia ka jingpynpaw jong ka jingpyrshah bad ia ki daw halor kane ka Bill, u Bah Adelbert u la ong ba kane ka Bill ka kyntu na ka bynta ka bhah kyrpang ia ki Scheduled Tribe kiba duk ha ka Jylla haba pyntreikam ia ka State Reservation Policy.

U la ong ba katkum ki jingioh jingkhein lyngba ka sorkar Jylla ka pyni shai bad ka ioh ka kot jong kiba bun ki nongshong shnong ST ka Jylla ki long kiba tlot bad ki bym ioh lad.

“Ka Article 16(4) bad 15(5) jong ka Riti Synshar jong ka Ri India ka shah ia ka Jylla ban buh ia ki kyndon khnang ban pynthikna ba ki jingmyntoi jong ka jingai bhah ka dei ban poi sha ki nongshong shnong kiba duna ka liang ka ioh ka kot,” u la bynrap.

Nalor kata u Bah Adelbert u la ong ruh namar ba ki hynniew ngut ki nongbishar ka constitutional bench jong ka iingbishar Supreme Court ha ka 6:1 majority ki la pynksan ia ka jingtreikam jong ka sub-classification hapoh ka thup jong ki Scheduled Caste and Scheduled Tribe, bad ai ia ka rai ba ki Jylla ki don ia ka bor ba kin thaw ia kine ki jingpynhap ne buh kyrdan.

“Kumta ban weng ia kine ki jingeh ha ka jingiapher ha ka ioh ka kot hapdeng ki Scheduled Tribe ha ka Jylla, bad ban plie ia ki lad ha ka liang ka ioh kam ioh jam bad ki jingpule kiba kham shalor, ka donkam ban pyntreikam ia ka ain na ka bynta ban kyntiew ia kiba kum kine ki briew ki bym ioh lad ha ka Jylla,” ong shuh shuh u MLA ka VPP.