Kynnoh u Mukul ba don jingiadei bajan u CM ka jylla bad u nongkhaii drok na Mizoram

Syllad | The Rising MeghalayaSeptember 19, 2023

U nongialam liang pyrshah ka AITC uba dei ruh u Myntri Rangbah (CM) barim ka jylla u Mukul Sangma mynta ka sngi ba Ar u la kynnoh ia u CM ka jylla u Conrad K Sangma halor ka jingdon ia ka jingiadei kaba jan bad u nongkhaii drok ba hakhmat napoh ka jylla Mizoram.

Haba iashim bynta ha ka motion kaba iadei bad ka mat halor ka jingshyrkhei jong u drok hapoh ka dorbar Assembly, u Mukul u la ong ba u Henry Lalremsanga uba la shah kem noh ha ka 23 tarik u Iaiong 2013, halor ka jingioh kurup ia u drok pseudoephedrine tablets ba beain uba shongdor haduh T. 6 klur u dei uwei na kiba don ia ka jingiadei kaba jan bha bad u CM Conrad Sangma.

U la wanrah ruh ha miej ha ryngkat ka dur bad ong; “Kane ka dei ka dur jong u CM ha ryngkat ka kurim bad u Henry, kata ha kawei na ki prokram ba kongsan ha Delhi.”

“Nga hap ban ai jingmut ia u CM ba un kiar ban pyniajan bad une u briew. Hato u tip ia ki jingshisha,?” Buh jingkylli u Mukul da kaba bynrap “Kane ka dei ka jingialang kaba kyrpang ha Delhi. Kumta Nga la pyrshang ban lap kumno une u briew (Henry) u la ioh jaka ha kaba kum kane ka jingialang kaba kyrpang bad ia shong lang ha kajuh ka miej, kata hadien ba la pyntip ha nga ba ia kane ka jingpynbeit la kyrpad da ka ophis jong u CM,” ong u Mukul.

Nalor kane une u CM barim u la ong ruh ba ki lad pathai khubor ki la pynpaw ia u Henry Lalremsanga kum u snar ka kynhun runar khaii drok uba la shah kem noh ha ryngkat bad u khun jong u MLA barim ka seng Congress.

“U la wan na Mizoram bad ia don bynta ha ki kam khaii beain bad u Arvind Ahuja, u khun jong u MLA barim u Ashok Ahuja, bad u draibar jong u, u Manish uba la shah kem noh hynnin ka sngi na ka nongbah ha ryngkat 2,51,680 strip u dawai pseudoephedrine tablets. Katkum u Additional Commissioner of Police (Crime) la ong ba kine ki laingut ki donkti ha kaba pyniaid iew ia une u drok hapoh Mizoram bad kiwei apt ki jylla ka thain shatei lammihngi (Northeast) bad Myanmar,” ong shuh shuh u Mukul da kaba sot lyngba ki lad pathai khubor.

“Nga sngewkmen shibun ba Nga la ioh ban wanrah ia kane ha ka jingpyntip jong u CM, ailad ba un iaid lyngba, ailad ba un bishar bad Ngan ai jingmut, bad ka jingai jingmut lyngba u Lamphang ngin hap ban pynthikna ba ngin pynkut ia ka jingiadei bad kine ki briew. Kumta ruh haba u briew u la shah kynnoh ba u dei u snar nongkhaii drok, kumta ruh ngi dei ban long kiba sian,” ong shuh shuh u Mukul Sangma.

Haba pynpaw shuh shuh halor ka jingdonkam ban iakhun pyrshah ia ka jingshyrkhei jong u drok, une u nongialam ka AITC u la ong ba kane ka jingpynbna thma pyrshah ia u drok ka la kylla long ka jingpynbna da ka ri bad ym tang na ka bynta ka jylla Meghalaya.