Kynnoh shah beh kiba pang ba shitom ha u doktor Ummulong CHC, ong u doktor bym don um ka jaka sumar sma iwtung ka paiñkhana

Syllad | The Rising MeghalayaMay 16, 2019

JOWAI: Uwei u rangbah u la ujor sha ki ar tylli ki sengbhalang kiba kynthup ia ka All Jaintia Students ‘Union (AJSU) bad ka All Jaiñtia Hills Social Welfare Organisation (AJHSWO) ba ula shah beh na hospital Ummulong CHC haka por ba thiah pang ki khun.

Une u rangbah dei u ma H Suting uba thiah pang lai ngut ki khun ha Ummulong CHC haka miet 14 tarik une u bnai. Ula iathuh ba baroh ki nongpang kila shah beh ha utei u Senior Medical Officer, Ummulong CHC Dr. M Lamare ha katei ka miet.

La kynnoh ba kane ka jingshah beh ki nongpang kala jia haka 14 tarik une u bnai hala por 9PM, ha kaba ki nongthiah pang kiba jan shnong kila mih ha katei hi ka miet kat u ma Suting bad ki khun jong ki dei kiba na shnong Iongshiwiat kaba don sha ka thain Nartiang ki la mih noh haka sngi kaba bud.

Hadien ka jingioh ujor ka liang jong ki nongialam seng kiba kynthup ia u PS Phawa Secretary AJSU bad u Ram Biam President AJHSWO bad ki dkhot ryngkat u ma Suting bad uwei na ki khun ba shitom kila leit ban ia kynduh ia u Dr. M Lamare hynne ka sngi ha CHC Ummulong.

U Senior Medical Officer, Ummulong CHC Dr. M Lamare u la ong ba um shym la beh ia ki nongthiah pang, hynrei ka daw ka long namar ka jingbym don um ha kane ka CHC, kumta baroh ka Hospital ka la sma iwtung bad u la phah leit noh ia ki sha ïing namar u ong baka rukom shitom ne pang jong ki nongpang ba don ha katei ka sngi ka biang lada ki mih ruh bad dih tang ki dawai kiba u la ai, ban ia kaba ki sah hangne kin ioh pang shuh shuh tang na ka daw ka jingsma. U la ong ruh ka daw ka jingduh um ka dei ba ym don light.

Haba kylli balei ym don lad nawei ban pynbiang ha ba jia kumne ki khep u bad uwei u Dr Y. Sumer, ba don lang ki la ong bad ym don Fund ban thied ne shim um nawei pat.

Na ka liang kine ki ar seng kila pynpaw  ym dei ban shu beh ia ki nongpang namar kane kam dei ka hok jong u doctor ban beh ia ki bapang ba shitom. Lada duna ka um ne kino kino ki jingdonkam ka CHC ka sorkar ka dei ban pynbiang bad ki kino kino ki jaka sumar kim dei ban leh tohmet ïa kiba pang ba shitom.