Kynnoh ka TUR ba ka rukom treikam jong ka Meghalaya Investment Promotion Authority kam long kaba shai
Ka Thma U Rangli-Juki (TUR) ka la ioh ia ki RTI kaba ka la pan na ka tnat treikam bathymmai jong ka Sorkar Meghalaya kaba la tip kum ka Meghalaya Investment Promotion Authrority (MIPA), kaba pyni ruh ia ka jingthmu jong ka Sorkar ban wanrah ia ka Ain kaba iadei bad ka sengkam sengjam hapoh ka Jylla.
Lyngba u kyrwoh ka TUR ka la ong ba ka long ruh kaba sngewdiaw namar kane ka tnat treikam, ka Meghalaya Investment Promotion Authority, ka la pynkheiǹ ia ki kyndon jong ka RTI Act 2005 da kaba pynslem bad pyrshang ban buhrieh ia ki jingtip ba la pan da ka TUR. Dei tad hadien ba la ujor sha ka State Information Commission bad hadien ka jingbishar kaba ar ba na ka liang ka TUR ka la lah ban leit khmih ia ki kot ki sla, ki dulir bad ki file kiba don ha katei ka ophis treikam ha u bnai December 2024. Ka TUR ka shem ba don tang lai tylli ki file ha katei ka ophis treikam bad baroh ki kot ki sla, ki dulir, ki note sheet bad kiwei kiba lah ban ȉoh na katei ka ophis treikam, ka TUR ka la thep mynta ha ka website –hokmeghalaya.in khnang ba ki paidbah nongshong shnong ki lah ban peit bad pule ia ki.
Ka la ong ba ka pynkyndit shi katdei ban ȉohi ia ka rukom treikam jong kane ka tnat treikam ba thymmai jong ka Sorkar Meghalaya. Ym tang ma ngi kiba file ia ka RTI, hynrei wat ka ophis jong ka State Information Office ruh ka la shem jingeh ban lap ia ka jaka treikam jong ka Meghalaya Investment Promotion Authority. Nyngkong eh ha ka por ba ngi leit buh ia ka application RTI ngi shem ba don tang shi kynhun ki nongtrei kiba trei kum ki consultant bad ki bym tip ei ei shaphang ka kam ba ki trei bad kiba ong pynban ia ngi ba ki hap ban ai report ia baroh ki kam ba ki trei sha uwei u ophisar uba kyrteng u K Hynniewta jong ka Planning Department.
Kaba pynshaȉong shuh shuh ka long ba kane ka tnat treikam kaba thymmai kata ka Meghalaya Investment Promotion Authority ka dei ka tnat kaba mih na ka Aiǹ kaba la wanrah ha u bnai February 2024 bad la mynjur bad pynlong aiǹ ia ka ha u bnai March 2024. La pynlong ia kane ka Aiǹ khlem da kynjoh ktien ne pan jingmut na ki nongshong shnong bad kam shym la don hi ruh kano kano ka jingȉatai nia kyndon pa kyndon ha ka Ȋing Dorbar Thaw Aiǹ jong ka Jylla. Kane ka Aiǹ ka buh jingma ia ka Jylla bad ka jingthmu kaba paw ha ki kyndon jong ka, ka long kaba mynsaw bad kan buh jingeh ia ki trai shnong jong ka Jylla, kiba dei ki trai jong ka khyndew ka shyiap. Ha ka kyrteng jong ka roi ka par bad ban wanrah ia ki kam pynroi lyngba ka jingseng kam, kane ka Aiǹ ka thmu ban kurup lut ia ka bor ban pynȉaid ia ka khyndew ka shyiap bad ka ai bor tang ia ki katto katne ngut ki ban batai bad rai ki jaitkam aiu ban seng ne mano bei tyngka ha ka Jylla. Kumta kane kan khynniat sharud ia ki trai shnong na ki kam pynroi bad nang pynduh ia ka jinglong trai halor ka khyndew ka shyiap da ki trai shnong trai muluk.
Ka dei ka jingshisha ba kumba 80% ki trai shnong ka Jylla Meghalaya kim don khyndew ne kim don shuh ka jaka ka puta kaba ki long trai bad kane ka Aiǹ thymmai kan nang pynkha shuh shuh ia ki briew ki ban im khlem khyndew, khlem jaka, khlem puta bad khlem ȉing khlem sem. Kane ka Aiǹ thymmai ym tang ba ka buh jingma bad pynduh bor ia ka Land Transfer Act, hynrei ngi dei ruh ban sngewthuh ba ka long kaba ma namar lada la pyntreikam pura ia ka, lah lehse ban pyndonkam bakla ia ka tang da ki katto katne ngut kiba bat ia ka bor synshar ki ban sa pyndonkam ia ka na ka bynta ban myntoi shimet bad ban lum spah ȉalade, katba ki paid nongshong shnong bad ki trai shnong kin nang duk bad kylla phetwir ha la ka jong ka Ri.
Ngi dei ban tip ba kane ka tnat treikam, ka Meghalaya Investment Promotion Authority ka la treikam mynta bad ha ka rukom ka bym shai bad kaba buhrieh sop sop. Ka la sdang ban thaw ki plan bad kdew ia ki jaka ki puta ban pyndonkam ia ki na ka bynta ki project kiba thymmai, khamtam ia kito ki jaka bad ki khyndew kiba don hapoh ka Nongbah Shillong. Na ki bui jong ki jingȉashong committee jong kane ka tnat treikam lah ban shem ba ka la don ka jingȉakren ban pynheh ia ka surok Bivar Road da kaba pom bad pynrit ia ka jaka kaba don ha Wards Lake (Nan polok). Ka Nongbah Shillong ka dei ka Nongbah kaba rit bad kaba don tang 2 ne 3 tylli tylli ki jaka paidbah kiba kylluid bad kiba pangad, kumta kane ka jingthmu ban shim bad ot noh ia ka khyndew kaba don ha Nan Polok ka dei ka jingleh ibeiǹ ia ki nongshong shnong jong ka Nongbah. Sa kawei ka jingȉakren bad jingai jingmut ha ki meeting ka long ban shim noh ia ka Ȋingmane English Srevice kaba don ha Police Bazar, Khyndai Lad. Ki thmu kumne khlem da kheiǹ snep ia ka jingsngew jong kiba bun ki paidbah bad ki riewngeit.
Kum kine ki jingthmu, ki jingai jingmut bad kiwei de kiba khlem pat paw pyrthei kiba ka Sorkar Jylla ka khohreh ban pyntreikam ia ki project bapher lyngba ka Meghalaya Investment Promotion Authority. Ha ka kyrteng jong ka roi ka par bad ban pynlong ia ka Jylla ban poi sha kata ka thong ban roi haduh kumba 10 billion dollar ha ka ȉoh ka kot, khlem ki kyndon ne jingteh kyndon kiba biang ban ȉada ia ka jinglong trai halor ka khyndew ka shyiap da ki trai shnong, khlem ki kyndon ban ǹiewkor bad ban pynneh pynsah ia ka mariang, ban ȉada bad kyntiew ia ki nongtrei nongbylla, ban pynrit ia ka kharai kaba pynȉakhlad hapdeng uba duk bad ba riewspah, kane ka Ain ka buh ia ka Jylla bad ki nongshong shnong jong ha ka jingma kaba shyrkhei.
Kumta ka TUR ka pyrshah jur ia kane ka Ain bad ia ka rukom treikam kaba sop sop jong kane ka tnat treikam kaba long pyrshah ia ka rukom synshar paidbah. Kane ka Sorkar ka pyrshang ruh ban wanrah ia ki rukom treikam kiba thymmai kiba lah ban pyndam ia ka tynrai jingsynshar paidbah. Kumta ngi dei ban pynkhlain ia ka synshar paidbah bad ban pynlong ia ka Jylla Meghalaya kaba roi ryntih ha ka kamai kajih bad ka ioh ka kot. Bad ngi dei ban pyndam shi syndon ia ka jinglah shilliang ha ka ioh ka kot hapdeng ki nongshong shnong ka Jylla.
Facebook
Instagram
Youtube
Twitter
Leave a Reply