Kynnoh ka HYC ba sam ka Tnat Housing da ki tin sop iing ki bym biang wat tang ban tap sem ri jingri

Syllad | The Rising MeghalayaJune 21, 2024

Ka Seng Hynniewtrep Youth Council (HYC) ha ka 20 tarik Jylliew kala kynnoh ba ki tin sop ba sam ka tnad Housing sha ki C&RD Block ki dei ki tin sop iing kiba bym biang bad kiba bym bha wat tang ban sop iaki sem ri jingri bad kala dawa ban pynphai noh ia baroh ki tin sop iing kaba pynioh da ka kompeni kaba na West Bengal sha ki C&RD block bapher bapher bad ban pynsangeh mardor ha kaba iadei bad ka jingsam ia kine ki tin.

Ha ka shithi sha u Myntri Rangbah ka Jylla u Conrad K Sangma, u President ka HYC u Bah Roykupar Synem u la ong ba ha ka jingtohkit ba la pynlong da ka Council la shem ba ka Directorate of Housing, Meghalaya ka la sam da ki tin sop iing ki bym bha ne sub-standard ia kaba la pynioh da ka kompeni ‘Hariana Iron Works Pvt. Ltd, Kolkata, West Bengal’ kaba ha ka jingshisha kam dei satia kaba pynmih ne supply ia ki tin sop iing katkum ki jingtreikam jong ka kompeni.

“Katkum ka jingtip kaba ngi la ioh, ka Directorate of Housing ka la shim ia ka order lyngba kane ka kompeni na ka bynta ban pynioh ia ki tin sop iing ‘Corrugated Aluminium Roofing Sheet in AA3105H18 Alloy kiba jrong 8 phut, ka jingpynkiang kaba 800MM bad ka jingrben kaba 0.45MM, kata kumba la leh ruh ha ki por kiba la dep,” ong u Bah Roykupar.

“Ha ka jingshisha ka jingrben kaba 0.45 MM ka dei kaba biang katkum ka standard na ka bynta ki tin sop iing kiba bha ia kiba la sam ruh sha ki nongioh jingmyntoi ha ki por kiba la dep. Hynrei, ha ka jingtohkit jong ka seng bad katkum ki jingujor ba la ioh pdiang na kiba ia don bynta, la shem ba kine ki tin ba la pynioh da katei ka kompeni ki dei kiba don tang 0.25 MM ka jingrben bad ki dei ki bym bha bad ki bym biang ruh wat ban tap ia ki sem jong ki mrad ne ki jingri jingdup khlem da khein ia ki iingbriew,” u la bynrap.

Nalor kata une u nongialam ka HYC u la ong ruh namar ka jingpynlut ka dei lyngba ka pisa u paidbah, kumta ka HYC ka dawa ban pynlong mardor ia ka jingtohkit kaba bniah ha kaba iadei bad ka phang ka jingpynioh bad supply ia kine ki tin sop iing ki bym bha kiba long markhongpong ia ka order ba la pynkhreh da ka Tnat Housing bad ruh ban leh ia kaba donkam.

Na ka liang u president ka Seng u la dawa ban shim ka jingpynshitom pyrshah ia u Director, Directorate of Housing, Government of Meghalaya, Shillong kiba dei ki nongthied bad /lane ia ki ophisar kiba donkti ha kaba iadei bad ka jingpynioh ia kine ki tin sop iing ki bym bha, kumjuh ban blacklist ia ka kompeni Hariana Iron Works Pvt. Ltd, Kolkata, West Bengal na kino kino ki jingiatreikam kiba hadien habud bad ka sorkar Meghalaya bad ruh ban shim ia ki lad jingpynshitom katkum ka ain namar kine ki jingleh jingkam ba beain.

Ha kajuh ka por u Bah Synrem u la dawa ruh ban shim ka jingpynshitom pyrshah ia ki Block Development Officer(s) lane ia kino kino ki ophisar jong ki C&RD Block kiba pdiang ia kine ki tin sop iing ba la pynioh sha ki khlem da bishar bniah ia ka jinglong jingman jong ka mar.

“Lada kam don ka jingshim ia ki lad jingpynshitom kiba mardor, kumta ruh na ka liang ka Seng kam banse ban shim ia ki sienjam ban pynlong da ka jingiakhih pyrshah ia kine ki jingleh kam bymman ha ka liang ka sorkar, ki supplier bad baroh kito kiba don bynta ha kaba pyndonkam bakla ia ka pisa u paidbah,” u la ong shuh shuh.

Shuh shuh u la kyntu ruh halor ka jingdonkam ban thung ia u Nodal Officer na ka bynta ban pynlong ia ka spot inspection lane ka jingpynthikna halor ka jingbha jong kine ki tin ba la dep supply sha ki C&RD Block bapher bapher hapoh Rilum Khasi bad Jaintia.