Kynmoo burom ka Loomkyrwiang Dorbar Chnong ya ka sngi iap U Kiang Nangbah

Syllad | The Rising MeghalayaDecember 31, 2023

Ka 30tarik Kmaichonglad toh ka sngi Iap u Kiang Nangbah Khlawait ka Ri 12 Dolloi heiwa da pasi ya o da ki Chipai ka Sorkar Phareng ha u snem 1862.

Kamtae hapoh ka Bri u Niawtrep Niawskum kam ka dak I Sniawngooh Makhane ya ki kam wakhroo u Kiang Nangbah ya ka Ri wa ka Jairbru ki patein kani ka juk ha kyllein ki shnong ki thaw da pynman ki I kynmoo burom wa kyrpang da ki prokram wapher.

Ha uni u snem ka Loomkyrwiang Dorbar Chnong leh ha ka thong wow khriñ wei pynpsiah hei thij I pyrkhat ki bru wa chongchnong chaphang u Kiang Nangbah hei janmiet iong ka 30tarik da pynman ko I yachemlang wa kyrpang ha Yungwalieh  wei dasam leh ya ki prize cha kiwa jop iong ka yakop thoh Poitri wei dro dur chaphang u Kiang Nangbah.

Ha ka yalang iong kani ka sngi hei pynlai u Daioolang Pakma, Symbood Waheh Chnong da em I suki wa chipor kam ka dak I kynmoo burom kynmoo Maia iow Kiang Nangbah wa ya kiwi ki Nongyaleh laitlooid neitae pynbood I ngoohblai na u S.D Laloo, General Secretary LDCJ, I klam I khanna wa kyrpang chaphang u Kiang Nangbah da u Lammat-O Laloo, Waheh Chnong LDCJ, I klam e mynsien ya ki khon ka Dorbar Chnong da u Kongsan Ma Roskil Challam, SDO-PHE Electrical Division, Jowai  katwa hei pynkut wan ka Samhakani Laloo, Secretary WWO LDCJ da pachat ko ki kyntien khublei.