Kylla uniform biang u MDC Mynsngat Khanduli, ïoh bsuh khlieh ka BJP haka UDA ka JHADC

Syllad | The Rising MeghalayaJuly 22, 2021

U MDC jong ka Mynsngat Khanduli Dawan Lyngdoh ula kylla uniform bad wanphai biang sha ka United Democratic Party (UDP) bad u MDC ka Sumer, Krison Langstang uba la iasoh sha Bharatiya Janata Party (BJP) hadien ba ula phet naka UDP ula ioh ban bsuh khlieh haka Executive Committee kaba ialam da u ma Thombor Shiwat kum u Chief Executive Member (CEM), Jaintia Hills District Autonomous District Council (JHADC).

Kane ka Executive Committee kaba ialam naka NPP bad UDP hapoh ka kynhun United Democratic Alliance (UDA) kila pdiang hun ia kine ki ar ngut ki MDC bad ka shuki u ma Thombor Shiwat ruh kala nang nang skhem.

U ma Thombor Shiwat ula thung ruh ia kine ki ar ngut ki ki Vice-Chairman. Ia u Dawan Lyngdoh la thung kum u Vice-Chairman ka Public Grievances Committee bad ka ia u Krison Langstang la thung kum Vice-Chairman ka Planning Board. U ma Shiwat ula wanrah iaka official report haka dorbar lyuir kaba long haka sngi Palei.

Ther tyngeh u Ma Thombor Shiwat iaka jingbam ar maloi ki shnong Border Assam Meghalaya

Kumban shu pynkynmaw ha u snem Nailar 2019 saw ngut ki MDC UDP kiba kynthup Lakhon Biam Chairman barim ka JHADC, u Dawan Lyngdoh, Krison Langstang, J Treilang Suchiang kiba jop United Democratic Party (UDP) kila rung sha ka BJP.

Kane ka jingrung BJP jong ki MDC kala wanrah ka jingklumar haka synshar khaddar ka JHADC kaba la poi ruh sha ka ïinglieh ïingsaw halor ka kam Chairman ka konsil hadien ba u ma Andrew Shullai ula ujor sha ka iingbishar Meghalaya High Court.

U Ma Finlyness Bareh MDC UDP uba la shah jied kum u Chairman, wat tang shisien ruh um ioh pyniaid dorbar, bad ula hap ban resign hadien ba um ioh ban pyniaid wat tang iaka dorbar Talang ka JHADC ha u bnai Naiwieng 2019.

Tang hadien katto katne u J Treilang Suchiang ula ruh pat sha ka NPP, katba kine ki laingut kila neh sah haka BJP.

Mynta pat, shuwa ka dorbar lyuir, u Dawan Lyngdoh ula wanphai biang sha ka UDP, katba u Krison u neh haka BJP ban kyrshan iaka EC kaba ialam u ma Thombor.

Mynta ka liang pyrshah kala duna pait biang bad sah satang u 2 ngut ki Congress kaba kyntup ia u ma Awhai Andrew Shullai bad u ma Holando Lamin hadien ba u Chairman barim jong ka JHADC u Arbor Hima Darnei, bad u Aiborlang Shadap kiba la rung sha ka NPP. Katba u ma Lakhon Biam pat un neh hi haka liang pyrshah.