Kylla ka Jowai sha ka sma town

Syllad | The Rising MeghalayaJuly 27, 2021

Ka sor Jowai kaba la pynkhreh ban kyntiew kyrdan iaka sha ka Jowai Smart Town kala kylla pynban sha ka Jowai Sma Town hadien ba kala syrtap da ki ñiut ha kylleng ki basa iew bad ki ïing ki sem jong ki briew kaba la wanrah iaka jingsma iwtung kaba lah ban ktah iaka koit ka khiah ki briew.

Kane ka jia long namar ba phiel ka Jowai Municipal Board (JMB) ban lum ban lang ñiut kiba mih man sngi ha Jowai kiba ym duna iaka 40-50 ton haka shi sngi.

Ki basa iew bad ki jaka ieng kali kila dap da ki ñiut hadien baka JMB kam shym la pynlang ñiut namar ba kam ioh jaka ban bret iaki ñiuit. Dangshen ka JMB kala leit bret sha Marten, Mawiong hynrei hadien bala mih ka jingpyrshah kala hap ban sangeh ban bret sha Marten.

U Ma OR Shallam, ula kynthoh tyngeh ia u MLA Jowai bad u Myntri Pynroi sor ba kim lah satia ban pynjem ia kane ka jingeh u paidbah ha Jowai.

“Ka Jylla kala pynkhreh ban rakhe iaka lyngkhuh snem ba 50 ka jingioh jylla ba pura, hynrei ka Jowai ka shnong ba ieid jong ngi tang ka jaka pynlang ne theh ñiut ba pura kam don satia wat la niew iaka Jowai kum ka ïitkhmih ka rilum Jaintia,” la kren bynñiaw u Ma Shallam.

U MLA Jowai uba la khot jingialang naka bynta ka Jowai Smart Town um dei shuh shuh ban pynbun kam ia kiei kiei kiba ym lah long bad u dei ban pynioh shuwa iaka jaka bret ñiut kaba paka, la ong u ma Shallam.

Nalor kata u ma Shallam ula ban jur ban pyndep iaka Iawmusiang kumba u MLA ula khlei iaka jubanlak na ka por shaka por.

U ma Shallam ula kyrpad ia baroh ki waheh chnong Jowai bad ki nongshong shnong ban pyrkhat ia kane ka jingktah ki jaboh jabain kaba lah ban ktah ruh iaka koit ka khiah u nongshong shnong.