Kut noh ka prokam aijinghikai seng kam ba shitaiew ka Kiang Nangbah Govt College, Jowai

Syllad | The Rising MeghalayaNovember 3, 2024

Ka Entrepreneurship Development Centre (EDC), Kiang Nangbah Government College (KNGC), Jowai da ka jingsngew kmen ka la lah ban pynkut noh ia ka Entrepreneurship Development Programme (EDP) kaba shi taiew kynthih na ka bynta ka Batch kaba nyngkong kaba la sdang naduh ka 21 haduh ka 25 tarik u Risaw 2024.

Kane ka sienjam ka thmu ban pynkup bor ia kito kiba angnud ban seng ia ki kam ki jam lajong lyngba ki jingtip bad ki sap ki phong ba kongsan ba ki la ioh lyngba kane ka prokram aijinghikai ha kaba kin lah ruh ban pyniaid shakhmat ia ki kam ki jam ki jong ki bad ban ioh ia ka jingjop.

Kane ka prokram ka thmu ban aijinghikai ia 10 ngut ki nongiashim bynta kaba kynthup ia ki samla pule bad ki nongseng kam lajong kiba dei ki trai shnong ia kiba la jied na ka Entrepreneurship Awareness Programme (EAP) hadien ba ki la lah ban pyni ia ki jait kam kiba ki thmu ban seng.

Kine ki nongiashim bynta ha kane ka prokram ki dei na kylleng ka thain East bad West Jaintia Hills District.Kane ka jingai jinghikai kaba shitaiew ka kynthup ia ki jingiamir jingmut, ki jingleit jurip ban pynpaw pyrthei bad ki jingshna bad jingpynkhreh ban pyni ia ki sap ha ka sengkam sengjam khnang ban kyntiew ia ka jingtbit kaba kham jylliew ia ka kam.Ha ryngkat ka jingiatreilang bad ki nongkhaii bad ki nongseng kam seng jam jong ka thain, ka EDC ka la pynlong ruh ia ka jingleit jngoh kaba plielad ia ki nongiashim bynta ba kin ioh ban sakhi nyngkong eh ia ki jingseng kam kiba jop bad ki rukom treikam bathymmai ba ki la shim.

Ki bynta ba kongsan kiba kynthup ha kane ka prokram ba la iashim bynta da ki riew shemphang bad ki nongseng kam seng jam ki kynthup halor ka Enterprise Development, Financial Literacy, Business Planning, Business Development Model, Market Research, Human Resource Management, Digital Marketing, Branding, Social Media bad Mobile Commerce, Government Schemes and Support.

Nalor kata ki nongiashim bynta ki la ioh ruh ia ka lad ban iakynduh ia ki riew shemphang ha ki kam karkhana, ki nongseng kam seng jam kiba la shemphang bad ki nonghikai kiba la iasam ia ki jinglap jingshem ba kordor kynthup ia ki jingshem ba shimet kaba la nang ai mynsiem shuh shuh ia ki nongiashim bynta.

Haba kren ha kane ka sngi, u Dr. Blessing Roy Suchiang, Programme Coordinator, EDC ha KNGC u la ong, “Ngi don ia ka jingkut jingmut kaba skhem bad shimkhia ban pynshlur bad pynroi ia ka mynsiem seng kam seng jam hapdeng ki samla.Lyngba kane ka prokram , ngi kwah ban aimynsiem ban shim ia ki sienjam kiba shlur ban pynurlong ia ki jingangnud jong ki ha ka kam khaii pateng bad ban noh synniang shibun na ka bynta ka ioh ka kot jong ka thain.”

Ka Centre ka khmih lynti ban pdiang shuh shuh ia ki jingthmu kiba pynkupbor bad pynshlur ia ki jingangnud halor ki lad seng kam seng jam khamtam hapdeng ki samla. Ka Entrepreneurship Development Programme kaba shi taiew ban wan na ka bynta ka Batch kaba ar kan sdang ha ka 4 tarik u Naiwieng 2024.