Kut noh ka projek ba shi snem ban kyntiew ia ka kam shna khiew ranei ha West Jaintia Hills

Syllad | The Rising MeghalayaMay 15, 2024

Ka project ba shi snem kynthih kaba dei ka skhim halor ka jingwad bniah ban kyntiew bad pynkhlain ia ka kam shna khiew ranei (Black Pottery) ha ka shnong Tyrshang bad Larnai, West Jaintia Hills ba la bei tyngka da ka Tnat Commerce & Industries (DC) ka sorkar Meghalaya bad ka jingpyntreikam lyngba ka Mahatma Gandhi Institute of Rural Industrialization (MGIRI) Wardha, Maharashtra, kaba dei ka R&D institute hapoh ka ministry ka MSME, ka Sorkar India ka la kut noh ha ka 14 tarik Jymmang. 

Ka jingiaid jong kane ka project ka long shi snem kynthih ka dei ka- Scheme on Studies for Promotion & Strengthening of Black Pottery at Tyrshang and Larnai village, West Jaintia Hills District, Meghalaya”. Ka MGIRI ka la pynkhreh ia kane ka project ha ki ar bynta.Kata ka Phasi I ka dei ka jingpule bad wad bniah ha kaba iadei bad ki nongshna ia kine ki khiew khyndew bad da kaba pynshong nongrim lyngba kine ki jingpule bniah ki la pynkhreh ia ki jingtreikam na ka bynta ka Phase II kaba kynthup halor ki jingpynshai bad ka jingkyntiew kaba neh ha kane ka kam.

Ia ka jingialang pynhap pyrshah ia kane ka project la pynlong hapoh Larnai Community Hall ha ka jingiadon lang u Bah ML Wanshong, Joint Director DCI, Shillong, Bah B Warjri, General Manager, DCIC, Dr. K Venkata Rao, Dy Director MGIRI, Kong S Kharpran, Functional Manager, DCIC, Jowai,  Larnai Village Chairman Bah Kyrmenlang Pyrtuh nalor ki dkhot kiba don bynta ha kane ka kam shna khiew khyndew.

Ha kane ka prokram u Dr K Venkata Rao u la ai ka jingkhublei kaba kyrpang ia kine ki nongshna khiew da kaba iai ban ruh halor ka jingdonkam ban pynneh ia kane ka sap bad ka jingpyntbit kaba ki la ioh lyngba kane ka rynsan aijinghikai kaba shi snem kynthih. U la pyrto ruh ia ka jingtrei minot ka jong ki ha baroh kane ka project bad ban pynlong kaba jop.

Kumjuh na ka liang u Bah ML Wanshong u la ai ka jingiaroh ia ka project Team halor ka jingtrei borbah ka jong ki na ka bynta ban pyniaid shakhmat ia kane ka prokram aijinghikai sha ki nongshna khiew khyndew kaba kynthup ruh nalor ka jingleit jurip ia ki jaka shna khiew sha Siliguri bad sha Varanasi kaba la iarap shibun ia ki ba kin ioh shuh shuh ia ka jingpyntbit.Nalor kata u la pynthikna ruh sha kine ki nongioh jinghikai ba na ka liang ka Tnat Commerce & Industries kan dang iai bteng ban aijingkyrshan na ka bynta jong ki.

Na ka liang ka kynhun jong ki nongshna khiew khyndew ki la ai khublei kyrpang ia u Dr. K Venkata Rao, Dy Director MGIRI bad ia ka kynhun jong u kumjuh ia ka Tnat Commerce & Industries halor ka kabu kaba ki la plie na ka bynta jong ki.Ki la pynpawr ruh ba kane ka projek aijinghikai kaba shi snem kynthih ym tang ba ka la kyntiew ia ka jingtbit hynrei ka la plielad ruh ba kin ioh leit sakhi sha ki jaka bapher bapher.

Lah ban kdew ba ka thong ba kongsan jong kane ka project ka long ban kyntiew shuh shuh ia kine ki jait kam karkhana  kiba la rim bah ha ryngkat ka jingphaikhmat ban kyntiew ia ka iew ka hat bad ia ka kamai ka kajih.