Kut noh ka lehniam Kopati Puja ka Raid Raliang

Syllad | The Rising MeghalayaNovember 27, 2022

Ka lehniam Kopati Puja kawei na ki jinglehniam jong ki khun ki raïot u Dolloi ka Elaka Raliang hadien bala dep lum lang ia u kba u khaw sha u thiar kala poi noh sha kaba kut haka sngi Saitjain.

Kane ka jinglehniam kala sdang haka sngi Thohdieng da ki jinglehniam ha Law Kyntang kaba la pyndep da u Wamon. Hadien pat bud sa ka shad Pastieh kaba la shimbynta da u Wamon, u Doloi, ki Langdoh, ki rangbah Kur bad kiwei kiwei ki nongialam niam ka raij ha ryngkat ka jingud jong ki ksing ki dhah.

Ha ka sngi pynkut jong kane ka jinglehniam nalor ka jingshad Pastien ha Ïaw kyntang bad ha ïing u Wamon ka Kopati Puja Cultural Committee ka la pynlong ruh ïaka jingïakynduh lang ha madan Chrah Umphula, Raliang ha kaba ki khun ka Niamtre na ki San Raij-San Lyngdoh ki la wan ban ïashim bynta ha ryngkat ka riam ka beit kaba i phuh i pheing.

La wan sakhilsang da u Manbha Kyndoh, Dolloi Elaka Narpuh kum u kongsan haka jingdonlang u Dolloi Elaka Nangbah, u Dolloi Elaka Shangpung, Dolloi Elaka Amwi bad u Dolloi Elaka Jowai ki riew rangbah bad kiwei.

Haka jingïalang ba la pynïaid da u Hamjhan Dkhar, u Dakynsai Dkhar ula ai ka nguh ka dem, u Elad Lyngdoh kum uwei na ki riew rangbah ka Raij Raliang ula ai ka jingkren lyngkot shaphang ka lehniam Kopati Puja.

Kiwei kiba la ai ka jingkren bad ki kyntien ai mynsiem ïaki khun ka Raij ka Elaka ki long ka Ribakordor Lyngdoh, u Rikut Parien, Waheh Raij Ionglang, u Puramon Kynjin, Dolloi Elaka Jowai bad u Chawas Lyngdoh, Dolloi Elaka Raliang.

U Manbha Kyndoh, Dolloi Elaka Narpuh haba ai jingkren kum u kongsan ula ong ka jinglah ban bud bad pynneh pynsah ïaka niam rukom dustur ba la hikai ki manshwa longshwa ka long ka jingsarong ïaka ri bad ka jaitbynriew, shuh shuh ula pashat ki kyntien ai mynsiem ïaki khun ka Raij ka Elaka ba kin long kiba ïa tylli bad im ban shakri da ka lynti jong ka hok.

Ha kane ka sngi la pynshong shit ïaki paidbah da ki jingshad bad jingrwai ba la shim bynta da ki khun samla bad ki longkmie na ki Raij ki shnong bapher bad la pynkut pat da ka jingpynlait paidbah ki Dolloi ïaka Almanak 2023 jong ka Seinraij Raliang.