Kut noh ka Behdeiñkhlam ka Raij Mukhla hadpeng ka jingiphuh iphieng

Syllad | The Rising MeghalayaAugust 23, 2019

JOWAI: Ka lehniam Behdeiñkhlam jong ka Raij Mukhla ka la poi sha kaba kut haka sngi Thohdieng ha kaba haduh 10 tylli ki rot kila wan poi haka pung kyntang (Biar) jong ka Raij Mukhla kiba la wan rah na ki dong bapher bapher ka Raij Mukhla.

Ka Behdeiñkhlam ka Raij Mukhla, kaba dei ka Behdeiñkhlam kaba khatduh eh ban pyndep ha Rilum Jaintia. Kane ka lehniam kala sdang naduh ka 21 tarik une u bnai bad kala poi sha kaba kut hynne ka sngi hapdeng ka jingiphuh iphieng bad la wan ruh ban sakhi da u Myntri Rangbah ka Jylla Conrad K Sangma, Samlin Malngiang Myntri ka tnad PHE, u Wailadmiki Shylla, MLA Jowai bad kiwei kiwei ki MLA, ki MDC, ki Dolloi bad kiwei kiwei ki riew rangbah.

Kane ka lehniam Behdeiñkhlam jong ka Raij Mukhla haka sngi khatduh la sdang naduh ka por 6 baje mynstep daka jing kyntiñ Khnong da ki Khun ka Seiñ Raij Mukhla ha ïing (Iung) Langdoh jong ka dong Mukhla Nongrim bud sa ka Shad ka nguh ka dem ha kawei pa kawei ka longïing ba pyndep da ki wasan.

Haka nohphai sngi la rah ïa ki rot ha Madan Slot Masi bad la pynhiar sha ka pung kyntang, ka biar. Shuwa kane la wanrah Dieñkhlam na ka Wahshnong, Neiñshnong (Mukhla Umlangshor)

U Ma Wailadmiki Shylla haba kren ban pdiang ia baroh kiba wan sakhi ia ka Behdeiñkhlam ka Raij Mukhla, ula ong ba mynshuwa ka Behdeiñkhlam la pyndep na ka bynta ban beh ïaka khlam, hynrei mynta pat la pyndep iaka Behdeiñkhlam ban beh ïaka jingsniew ka imlang ka sahlang.

U Myntri Rangbah haba kren ula ong ba ka Behdeiñkhlam, kala long kawei na ki tamasa kaba long kum ka jingpynithuh sha ka pyrthei ïaka Rilum Jaiñtia bad ka Jylla bad kane ka tamasa kala khring ïa ki nongwan jngoh kai na kylleng ban hiar sha kane ka thain ban sakhi iaka Behdeiñkhlam, kumta ula ban jur ba donkam ban pynneh pynsah ïaka kolshor bad ka riti ka dustur ban pynpaw sha ka pyrthei iaka jingriew spah ka kolshor ki jaidbynriew ka Jylla.