Kut noh ka Aiom Lehkmen Ki Khynnah Seng Khasi Seinraij ha Mukhap

Syllad | The Rising MeghalayaJanuary 17, 2022

Ka Lympung kaba 16 jong ki khynnah Seng Khasi Seiñraij kaba la long haka shnong Mukhap, West Jaintia Hills District kala poi sha kaba kut haka Sngi Robibar hadpeng ka jingiphuh iphieng bad shongkun shongblei.

Ka phang pdeng jong kane ka lympung ka long “Hala Thymmei Ban Tei Ia ka Lawei”.

U kongsan ha kane ka lympung udei u Pa’iem Ainam Manik Syiem, Syiem ka Hima Mylliem haka jingïadonlang u MLA ka thaiñ U Ma Nujorki Sungoh, u MLA ka 2-Jowai Constituency u Ma Wailadmiki Shylla, u MDC ka thaiñ u Ma Winning Garland Sungoh bad kiwei kiwei. Ïaka jingïalang la pynïaid da ki khynnah ka Seng Khynnah Seiñraij Mukhap ba kynthup u Kyrmenmi Ymbon bad ka Rideihok Niang.

Ka Hakawaneimi Ymbon na Mukhap Laskeiñ Pyllun haba batai halor ka phang “Hala Thymmei Ban Tei Ia ka Lawei” ka la ong ba kane ka phang ka long shi bynta ban ïalap bad wer ïaki khynnah naduh ba ki dang rit ba kin nang ban tip thuh bad ban bud ryntih ïaki jinghikai u mynbarim ha kajuh ka por ban sngewthuh bad shemphang ïa la ka jong ka jinghikai niam tynrai.

U Paiem Ainam Manik Syiem kum u kongsan ula kren shaphang ka jingïaineh haka jingkylla jong ka jingïaid ka por. Ula ong ka Niam tynrai kadei ka nongkynti jong ka jaitbynriew Hynñiewtrep Hynñiewskum kaba la ïoh pateng na ki Kñi ki Kong mynba dang synshar ka hok ne ka kajuh jong ka aïom ksiar.

“Ki bor ba na bar ki ïaleh katba lah ban pyndkhut ïaka jingngeit tynrai jong ki niam Khasi Niamtre., hynrei ki hep barit ki long ki rishot jong ka niam bad ka jaitbynriew,” la ong Pa’iem bad ula kyntu ia ki ban ïaineh haka niam ka rukom tynrai namar ka jingïaineh ki khun Khasi Khara haka niam ka rukom tynrai ka long ka jingkyrkhu ïaka jaitbynriew.

U Ma Nujorki Sungoh ula kren shaphang ka jingnang jingstad, ula kyntu ïaki nongïalam niam ban wad ki lad ki kyntu kumno ban pynrung haki jingmut jingpyrkhat jong ki khynnah ba kin ïeid bad bang ïaka jingnang jingstad namar lada ki khynnah ki ïoh ïaka jingnang jingstad ka jaitbynriew ruh kan im.

Ha kane ka lympung la ïoh ruh ïaki jingkren na u Akbarlang Synteng Nongdhar Seng Khynnah Seng Khasi Mawwan, Mylliem Pyllun uba la kren halor ka phang ‘Ka jingïadei ka kmie bad ki khun” kumjuh ki jingpule sneng Tymmen bad batai sneng Tymmen na ka Kynjai-ïa-phi Nongkynrih Seng Khynnah Seng Khasi Ri Raid Laban, Shillong Circle, ka Annissa Sympli Seng Khynnah Seng Raij Deinchynrum, East Jaintia Hills District bad na ka Sankidaroi Phawa Seng Khynnah Seng Khasi Seinraij Ïalong, Jowai Pyllun.

Nalor kata la ïoh ruh ka jingkren lyngkot na u Ma Puramon Kynjing President Lympung Ki Khynnah Seng Khasi Seinraij bad ka jingpule ïaka kaiphot (report) na u SP Lyngdoh General Secretary Lympung ki Khynnah Seng Khasi Seinraij.

Ki khynnah kila pyni ïa la ki jong ki sap ba nylla naduh ka rwai ka siaw, ka put ka tem ka shad ka kmen, kiba ïa kine baroh la pynsawa jam beit tang ïa kawei ka sur bad katta ka long ka jingkyrsiew thiah naka bynta ban pynneh bad ban pynim ia la ka jong ka niam tynrai.

La sam khusnam ruh sha ki nongjop haki jingïakob ïalehkai bapher bapher kynthup naduh ka jingïakop dro dur halor ka phang “Pynneh pynsah ïaka Mariang”, ka jingïakop pyni riam tynrai ba la shim bynta da ki khynnah kynthei bad shynrang bad kiwei kiwei ki jingïakop.

Ïa kane ka lympung la pynkut da ka jingaiti ïa ka dongmusa na ka kti jong ka Seng Khynnah Mukhap sha ka Seng Khynnah Seng Khasi Krang, Diengïei Pyllun ka ban shim pat ïaka bynta ban pynkhreh ban pynlong ïaka Lympung kaba 17 ha u snem ban wan.

Ha kane ka sngi la plie ruh ia u maw sahnam ka lympung ba 16 ki khynnah ha Mukhap.

Hadien kane, u Rgh D.K Dkhar President Seng Khasi Kmie ula shim ïaka bynta ban pynhap ïaka lama jong ka seng kum ka dak ka jingpynwai noh ïa kane ka Lympung kaba 16.