Kut noh ka 2nd National Ranking Archery Tournament

Syllad | The Rising MeghalayaMarch 27, 2023

Ka iakop siat khnam ba la tip iaka kum ka 2nd NTPC National Ranking Archery  Tournament (NRAT) 2023 ia kaba la pynlong ia ka da ka synjuk Archery Association of India (AAI) bad ka Archery Association of Meghalaya (AAM), kala poi noh sha kaba kut haka sngi Nyngkong, ha madan ia kilan siat khnam jong ka SAI STC, kaba don ha kut ka skul bah NEHU.

U kongsan ba la wan ban don lang ha kae ka sngi ba pynkut ia kane ka jingiakob dei u  SP Shukla, Vice Chancellor, NEHU, u Working President ka MSOA bah John F Kharshiing, Brigadier Robi Kapoor, 58GTC,  U Prof AS Dixit, Registrar, NEHU, bad kumjuh President ka Archery Association of Meghalaya Kong Matsiewdor War Nongbri (IAS).

Ha kane ka kynti la don haduh 391 ngut ki nongwan iashim bynta, kaba kynthup Sub Junior – 78, Junior – 115, Senior – 198.

Haba phai sha ka kyrdan iakhun jong kiba la heh (senior) ka  jylla Meghalaya ka long kaba donbok ba kan shem bad iohi ia ka jingwan ban iashim bynta ka jong ki rang bad ki thei ialehkai ba kynsai bad ba la pawnam, kaba kynthup ia 2 ngut ki nongialehkai ba la ioh ia ka khusnam Padma Shri, 5 ngut kiba la ioh ia ka khusnam Arjuna sa 5 ngut ki nongialehkai ba la mihkhmat ia ka ri haduh ka Olympic bad  sa kumba 36 ngut kiwei pat kiba la mihkhmat  iaka ri ha kiba bun ki lympung bah iakob siat khnam  jong ka pyrthei.