Kut ka ïalap elekshon MDC ha ki ar konsil; kham ma ha Rilum Jaiñtia Hills

Syllad | The Rising MeghalayaFebruary 26, 2019

JOWAI: Ka jingïalap elekshon MDC ha ki ar tylli ki District Council kala poi sha kaba kut da ka jingialang paidbah bad ki rally ha kylleng ki jaka.

Ha jingialang ba khatduh jong ki kyrtong bapher bapher kaba u syllad ula sakhi ha ka thain Shangpung, Raliang, Mowkaiaw kala long kaba shongshit.

Ha ka thain Mowkaiaw Raliang bad Shangpung kaba ka jingiakhun kalong tang hadpeng ka UDP bad NPP da ka jingpynibor bad ka jingpyni ïaka jingbun paid.

Ha Raliang ki paid nongkyrshan jong u kyrtong UDP u ma Bison Iano kila tuid sha ka jingialang paidbah ha ka shnong Raliang. Shuwa ban sdang ka jingialang ruh la iaid paidbah sha surok ryngkat ka sur ban khring iaki nongthep vote bym pat ai rai ïano yn jied kumjuh haba kut ka jingïalang ruh la pynlong ka jingiaid paidbah da ka jingkynhoi risa.

Kane ka thain ka jingiakhun kalong hadpeng u ma Bison bad u MLA ka barim ka Mowkiaw naka NPP u ma Robinus Syngkon.

Ha Mowkaiaw ka jingïalang jong ki kyrtong NPP, u Heirtami Suting kalong ha Mowtyrshiah kaba la wan hiar Sniawbhalang Dhar haka sngi pynkut ban pan ka jingkyrshan u paidbah ban pynjop ïa u kyrtong NPP.

Katba ka jingialang u kyrtong UDP u Winning Garland Sungoh kala long ha Mukhap ha kaba la ïadonlang u MLA ka thain u Nujorki Sungoh bad kiwei kiwei ki nongialam party.

Ki paidbah ha kane ka thain da ki trok ki bike ki thuk kila leit sha ka jingialang.

Kiwei kiwei ki kyrtong na ki thain bapher kila lum ki jingialang ha kylleng ki ka bad ki don ruh ki bym shym la pynlong hynrei kila leit ha manla ki thliew ïing ban pan ïaka vote jong ki.

Ha kane ka kynti ki don haduh 232 candidate’s kiban iakhun MDC na ar tylli ki konsil ka JHADC bad KHADC, kaba ka jingthep vote kan long haka 27 tarik bad ka jingniew vote 2 tarik u Lber.

Ka Rilum Jaiñtia ka dei ka kaba kham ma kaba lah ban mih ki jingkulmar ha ki katto katne ki jaka bad la bthah ïaka tnad Pulit ka Jylla ban shimkhia ban peit iaka shongsuk shongsain bad ban iaid beit ka jingthep vote, ong u Commissioner Secretary in-charge District Council Affairs (DCA) Tining Dkhar.