Kumno Ngi Dei Ban Jied

Syllad | The Rising MeghalayaFebruary 14, 2023

Tang mar dep jied Kyrtong Thymmai
Jingsngewsarong, bym lah batai
Synshar bahok, ban roi ka Ri.
Paidbah Nongjied ki khmih lynti.

Tang ioh Sorkar, bad ioh Myntri
La klet lut i’u Nongjied bapli
Ka Spah ‘lade,bun shah la kiew
La nang hiar pat, ka Jaidbynriew

Ki shong kali, ba tah iit iong
Ki iaid baheh, bad sngewsarong
Nongkieng suloi, nadien na khmat
Kali paidbah, sharud kyndat.

Kyrtong jingjop, ynda la ioh
Ki briew lajong, klet lut baroh
Ynda Aiom! jied sa shisien
Tyngkrein la wan, bad ka pnah ktien.

Pisa la shlei ban thied nongjied
Sharum shaneng donkam nongkit
Ban thied tad dor ia ki paidbah
Sa shisien pat, ban ioh lum spah

Nongjied ba la, jan ka samoi
Sdang ka shongshit, bad ka kynhoi!
Ban ioh khring biang, Paidbah ka Ri
Kyrtong ki ong “namar jong phi”.

Kyrtong bym mlien, kren ieit kren bha
Ani! pariah, sngewthamula
Tang mar kynduh, lynti syngkien
Tang ka kren sboh, bad ka bun ktien.

Wat! kiba sngewmeng, sngewsarong.
Kylla jinglong, da markhongpong!
Ade! jingsian khroh briew shisha
Kim ju lehrain, “Tyrwa Pisa”.

Ruh! ki bym ju, kren briew satia
Kynduh surok pat da heh nia
Arsap! kdup ieit, bad thap met bha
Buit khring pynbieij, ia Riew shida!

Poi sha ka thong, kata ki kwah
Ki buit bunjait, ban khroh ki lah
Jali jaum, pynbieij ieit Ri!
Tang pynthame, Nongjied bapli!

Hangne mynta, Ko! Khun ka Ri
Nga kwah kyntu, da i poitri
Kyrtong phin jied, lawei jong ngi
Hap bishar bha, hap peit sani!

Kynmaw Nongjied! wat bieij pisa
Lada ngi ngop, te la makna
Shon shap shisien, ba la bakla!
Phi la pyntroin, ia ka Jylla!

Por jied Kyrtong, bun jingtyrwa
Long sang long pop, ban shim pisa
Namar shisien, la thied iaphi!
Ban roi ki shnong, wat khmih lynti!

Rukom kanbas! bad theh tyngka
Paidbah to kiar, ia kum kita
Kum ki nongjied, la ju iohi
Kin klet iaphi, kwah tang shuki.

Don bun kyrtong, sngewjop lypa
Jingstad duna,bun tang tyngka!
Kumne Nongjop, la ju iohi
Long ‘niangkohnguh, ha Asembli!

Kynmaw nongjied pisa sangem
Hap khyllie pat, ha ki san snem
Nangno kin ioh, biang ia kata
Dei tang bamsap, pisa Jylla.

Da kynmaw ho! ko khun ka Ri
Mynta nga ong, nga sneng iaphi
Lada phi shim pisa ioh ei.
Phin kit ka pop, ha khmat U Blei

Jied Nongmihkhmat! Da kynmaw dngong!
Kyrdan pule, dei banyngkong
Lada jingstad ka dang duna!
Kin lah pynroi mo ia Jylla??

Khmih thuh Paidbah! Lawei ban bha
Kyrtong hap jied, Kyrtong shisha
Thungkam thungjam ia ki Samla
Kaba nyngkong kan dei kata!

Ba buh Nyngkong! ia Jaidbynriew
Ngin jied ia ki, Ka Ri kan kiew
Ka Niam Rukom, shadien ki buh
Jingpait jingpra ka dei ban duh!

Paidbah Nongjied, to iit mynta
Ia Nongthawain, wat jied ruma!
Da thew da woh, nangne shakhmat!
Ban Suk ka Ri, ban bha ban miat.

Da u Bah MF Mawlieh
Lathoh haka por Lockdown 08.05.2021