Kulmar ki nongbylla 100 sngi ha Laskein Block, hap pynphai ïaka pisa bylla sngi sha ki VEC: HANM

Syllad | The Rising MeghalayaMay 7, 2019

JOWAI: Ka seng Hynniewtrep Achik National Movement (HANM) Laskeiñ Block Circle, kala kynnoh ba ki Chairman/Secretary Village Employment Council (VEC) hapoh Laskeiñ Block, ki bthah ïaki nongtrei bylla kiba don job card ban pynphai biang ïaka pisa kaba la thep haka account na block sha ka VEC tang namar ki ai kontrak bad pyndonkam da ki kor ban trei ïaka skim Mahatma Gandhi National Rural Employment Guarantee Scheme ne ka skim bylla 100 sngi.

Ka HANM kala kynnoh ba bun tylli ki shnong ne ki VEC kiba don ha Laskeiñ Block ki shim kabu ïa kane ka skim kaba la mang ban ai kam 100 sngi ïa uwei pa uwei u nongshong shnong, pynban haka jaka ban ioh kam ki nongbat job card ki ai kam sha ki briew kiba don ki puh shilum bad kiwei kiwei ki kor kaba pynduh jingmyntoi ïa u paidbah ne nongtrei bylla.

Ka HANM kala kynnoh ba mynta kane ka jingleh jong ki VEC ban bthah iaki nongbat job card ban pynphai iaka ppisa kaba la poi haka account jong ki kala pynkulmar iaki nongtrei shi spah sngi.

U President HANM EJ Law, u la ong ba ia kito kiba ym shym la trei ne bylla ruh hynrei kiba don iaka Job Card, ka pisa ka rung hapoh ka Account jong ki bad ia kine ruh ki VEC ki phah sei ia ka pisa ban leit ai ha kti jong ki.

U la ong ruh ba ka seng kala lap ba kane ka jia ha VEC  Shangpung, Pamanik, Mynska bad kiwei ki VEC ba don hapoh ka Block Laskeiñ. Ha kaba ki VEC ki lehbor bad pyntrei da ki kor ki bor ïa kane ka skhim bad ki VEC byrthen ba lada ki paidbah kim mynjur iaka jingpyniaid ka VEC kin sangeh ban wanrah jingtrei lyngba ka 100 sngi.

U EJ Law u la ong ba ki VEC, haka jaka ba kin pynshlur ia ki nongbylla ban trei da ki kti ban ioh trei ki nong ioh job card, hynrei ki pyndonkam beit da ki puh shilum da kaba ai kontrak tang ban ioh myntoi ki katto katne hapoh ak VEC.