Kular u VC ka NEHU ban pyndep ia ka CAS da kaba pan ia ka jingiatreilang jong ki nonghikai
U Vice Chancellor ka North Eastern Hill University (NEHU) u Prof PS Shukla u la pynthikna ia ki nonghikai jong ka skulbah ban pyndep noh halor ka jingpynkhreh ia ka Career Advancement Scheme (CAS) na ka bynta ban lah ban pyniaid beit ha kaba iadei bad ka jingkyntiew kyrdan ha ka kam hapoh ki khyndiat bnai.
U Prof Shukla ha ka jingkyrpad ka jong u, u la pynpaw ka jingsngew burom bad ai khublei ia baroh ki nonghikai jong ka skulbah halor ka jingtrei shitom ka jong ki na ka bynta ka skulbah NEHU da kaba ong, “Phi long ki paia ba kongsan jong ka skulbah bad phi la btin bad ialam lynti ia ki samla bad pynwandur ia ka lawei ka jong ki lyngba ka jingkitkhlieh ha ka kam aijinghikai, jingwad bniah bad ka jingkiew ha ka liang ka pule puthi hapoh jong ka National Education Policy.”
Haba pynpaw ba ki kynrum kynram ba dang shen ki la ktah jur ha baroh ki liang na ka bynta ka skulbah, u VC u la ong, “Nga sngewthuh bha ba kine ki la wan pynslem halor ki kam kiba kongsan khamtam ha kaba iadei bad ka jingkyntiew kyrdan jong ka CAS. Haba nga la sdang halor ki kam ba iadei bad ka CAS ha ka sien kaba ar ha u snem 2024, ka jingthmu ka jong nga ka long ban pyndep noh ia ka jingkyntiew kyrdan ha u bnai Lber 2025, da kaba phaikhmat kyrpad na ka bynta kito kiba don ha ki kyrdan kiba halor ha ka kam shakri jong ki, khamtam kito kiba la jan shongthait noh na ka kam. Hynrei, ka long kaba sngew bynniaw namar ka jingmih jong ki jingeh kiba la pynthut kaba la pynsahkut ia ki kam ki jam baroh bad kaba dang iai bteng haduh mynta.”
“Nga sngewsih halor kane ka jingpynslem bad nga kwah ban pynthikna sha phi ba ka jingpynkhreh ba pura ia ka CAS ka dei ka mat kaba hakhmat eh. Nga kut jingmut skhem ban pyndep noh ia kane ka jingkyntiew kyrdan hapoh ki khyndiat bnai,” u la kular ia ki nonghikai da kaba bynrap, “Ka jingithuh bad ka jingai burom ia ka jingtrei shitom, ka jingaiti lut bad ka jingnoh synniang jong ki nonghikai jong ngi ka long kaba kongsan, bad nga ieng skhem ban pynthikna ba ki nonghikai kiba dei hok kin ioh ia ka jingithuh khlem kano kano ka jingpynslem.”
Nalor ka CAS u VC u la pynpaw ruh kumno ba ki kynrum kynram kiba la mih dang shen ki la ktah jur ia ka jingthmu ba kongsan jong ka skulbah NEHU ha ka liang ka jingnang jingstad bad halor ki kam wad bniah. U la ong ba ka jingtreikam kaba suki da ki bor ba dei khmih ka la wanrah ruh ka jingsuki halor ka jingshim ia ki rai ba kongsan bad kaba ktah ia ka samoi jingpule bad wanrah ruh ia ka jingbym thikna hapdeng ki samla pule ha kaba 82 % ki dei na ka jylla Meghalaya.
Haba kyrpad halor ka jingdonkam ban pynneh pat ia ka jinglong jingman kaba iaid beit iaid ryntih ha ka skulbah, u VC u la ong, “Kine ki samla pule ki phai sha ngi ban ioh ia ka jingbtin lynti, ka jingpynneh ia ka jinglong jingman bad ia ka jingnang jingstad. Ka dei ka jingkitkhlieh lang ka jong ngi ban pynioh ha ki ia kaba bha tam ha ka liang ka pule puthi. Ka skulbah ka kiew shaphrang haba ki nonghikai, ki nongtrei bad ki bor pyniaid ki iatreilang da ka jingsngewthuh jingmut bad bud ryntih ha ka liang ki jingai jinghikai.”
U la kular ruh da kaba ong, “Ki jingkhang ki jong nga ki long barabor kiba plie kumba ju lor. Nga don hangne ban sngap, ban iatreilang bad ban kyrshan iwei ia iwei ban pynurlong ia ka mishon ha ka liang ka pule puthi jong ka skulbah. To ngin ia jam lang shaphrang, ban iatylli lang da kawei ka jingmut bad ban trei ban pynlong ia ka NEHU ka jaka pule kaba baroh ngin sngew sarong.”
Facebook
Instagram
Youtube
Twitter
Leave a Reply