Kular u Sanbor Shullai ban wanrah ïaki jaka pule bad aspatal ba ïaryngkat kyrdan bad kiba don ha sor ha Jaiñtia Hills

Syllad | The Rising MeghalayaApril 1, 2019

JOWAI: U Sanbor Shullai kyrtong MP Lok Sabha jong ka Bharatiya Janata Party (BJP) na Shillong Seat ula kular ban wanrah ki jaka pule bad ki aspatal ha Rilum Jaiñtia kiba ïaryngkat kyrdan bad kiba don ha ki jaka sor hapoh ka Ri ba kin ai ka jingshakri kaba paka ïa u paidbah ka thaiñ.

“Ka Rilum Jaiñtia ka dang sahdien bha haka pule ka puthi kumjuh haka koit khiah bad bunsien nga la ïohi ba ki sengbhalang ki dawa naka sorkar ban pynbiang ïaki jingdonkam, hynrei haduh mynta bun ki nongpang haba leit phah sumar haki aspatal sorkar ki dang hap ban thiah ha madan ban ioh jingsumar”, la kren bynñiaw u Ma Sanbor Shullai haba kren haka jingïalap elekshon jong u kaba long ha Iawmusiang, Jowai haka sngi Nyngkong.

“Phi ki paidbah phi dei ban bishar bin pa bin ban jied ïa u nongmihkhmat bad phi dei ban jied ïa u MP u ban thaw sorkar ha Delhi ba wan ka roi ka par bad ka jingkylla”, la ong u Ma Sanbor. “Lada nga poi haka thong, ngan long kum u khun khatduh ka BJP bad kino kino ki mat ba ngan rah ngan ïoh beit ka lad ban iasaid naka bynta ka jong phi”, ong u Ma Shullai.

Ha kane ka jingïalang paidbah u ma Sanbor Shullai la ïadonlang u Ma Shibun Lyngdoh, BJP State President, Kong Amita Susngi State President BJP Mahila u ma Chaphrang Lyngdoh District President BJP bad kiwei kiwei ki riewbah na kylleng ka District.

“Ha ki 10 snem kiba la leit u MP jong ngi, u Ma Vincent H Pala ula shu shong kli kti ha kaba ym shym la leh eiei ban ïasaid naka bynta ka eh ka shon u paidbah. U (MP) la shu leh kamkai ïaka kam MP bad leh business ha Delhi tang ban myntoi ïalade”, la ong u Sanbor bad ula kren kop ruh ba dei ma u nyngkong eh na ki MP/MLA ban leit mih hakhmat u Myntri Rangbah duh ka Ri u Narendra Modi ha nongbah Delhi ban pyrshah ia ka CAB, bad kiba bun ki heh nia tang hapoh ka Jylla.

Watla ka BJP ka don tang ar ngut ki MLA ha Jylla, hynrei dei ma ki kiba leit pan jingïarap na ka sorkar ban pynïoh ïaka Diagnostic Centre kaba nyngkong eh ha nongbah Shillong ban pynioh ijngsumar ïa u ba duk ba suk. Ula ong ba dei maki kiba pynïoh jaka ha nongbah Delhi ban tei ia ka ïing mane Khristan bad ka BJP kam dei ka party kaba pyrshah niam Khristan ne khang bam dohmasi.