Kular u Bah Pala ban pynduh ia ka CUET namar ka khanglad ia bun ki samla ban ioh rung ha ki University

Syllad | The Rising MeghalayaApril 16, 2024

U MP ka Seng Congress u Bah Vincent H Pala ha ka 15 tarik Iaiong, u la kular skhem ba un pynduh noh ia ka Common University Entrance Test (CUET), ia kaba u sngew ka dei kaba la ktah jur ia ki hajar ngut ki samla pule ba kin ioh rung klass ha ki University.

Haba aijingkren ha ka jingialang ialap ilekshon ha Ladthadlaboh, Jowai, West Jaintia Hills District, u Bah Pala u la ong, “Ngi kwah ban pynduh noh ia ka CUET namar ka jingpynrung klas hapoh ki University bapher bapher ka dei ban shong ha ka jingshim rai jong ki University bad ym ha ka sorkar,”

Une u nongialam ka Congress u la ong ruh ba dei namar ka CUET, kiba bun bah ki samla pule ki la shah khanglad ban ioh rung klas hapoh ki University.

“Kumta ngi sngew bad ban jur ba ka jinglaitluid ban shim rai ha kaba iadei bad ka jingpynrung klas ka dei ban don ha ki University ym sha ka sorkar,” u la ong.

Ha kaba iadei bad ka ioh kam ioh jam, u Bah Pala u la ong ba lada ka Congress kan wan ha ka bor, ngin wan ha ryngkat ki polisi treikam ban pynthikna ba ki tulop jong ki samla kiba la nang la stad kam dei ban duna ia ka T. 1 lak shi snem.

Shuh shuh u la kular ruh ba ka Congress kan kyntiew ruh ia ki nongialehkai sport, kata khamtam na ka bynta kito kiba wan na ki longiing kiba duna ha ka ioh ka kot da kaba ai ia ka jingiarap pisa kaba T.10,000 shi snem.