Kular ka Kong Santa Mary Shylla ban iakren halor khyrdop BSF ha Sonapyrdi

Syllad | The Rising MeghalayaMay 9, 2023

Ka Kong Santa Mary Shylla haka sngi ba Ar kala kular ban shimkhia ban iakren bad ki bor ba halor ha kaba iadei bad ka jingdawa kynriah iaka khyrdop shipai Border Security Force (BSF) na Sonapyrdi, East Jaintia Hills District.

Ia kane kala ong haka jinghiar jurip jurip iaki shnong khappud bad ka Border Haat bad ka surok kaba dang pyntrei shait shait mynta, ka Sonapur Borkhat kaba jngai 40 KM kaba bei pisa da ka North East Road sector Development Scheme.

Ka Kong Santa kaba dei ruh ka MLA ka thain Sutnga Saipung, kaba bun ki shnong kiba hap ha kane ka thain ki iasam pud bad ka ri Bangladesh kum ka shnong Borsara, Lejri, Lahalein, Huroi bad Hingaria. Haka jingiaphylliew jingmut bad ki riew rangbah ka thain kala kular ban ai ka jingiatreilang bad ki nongshong shnong na ka bynta ban pynioh bording bad ki line mobile phone da kaba buh iaki tower ha katei ka thain khappud.

Ha kane ka jinghiar jurip ka kong Santa kala  iamir jingmut bad ki shipai Border Security Force (BSF) bad ki nongialam bad ki dkhot ka Khasi Students’ Union (KSU) Huroi unit halor ka jingdawa pynkynriah iaka khyrdop BSF ha Sonapyrdi, East Jaintia Hills District. Kala kular ban iakren bad ki bor ba dei peit ha kaba iadei bad ka jingsngewkhia ka KSU Huroi halor ka jingkylla mawjynthud ki BSF haka iaid ka ieng u paidbah.

Kumban shu pynkynmaw ba ka KSU Huroi naka por shaka por ka dawa ban pynkynriah ia katei ka khyrdop ki BSF ha Sonapyrdi namar ba ki pyndik ia u paidbah nongleit nongwan bad ki nongshong shnong ki shnong khappud India Bangladesh.

Ka KSU ka ong ba ki BSF ki ktah kti ruh iaki paidbah bad kim khein snep la ki dei ki riew kynthei bad thombor iaki.