Ktah ka jingtih mawshun ïaki tyllong um ka shnong Nongtalang, ong ka PHE bym bit ban dih ïaka um

Syllad | The Rising MeghalayaMay 3, 2019

JOWAI: Ka jingtihmawshun haka shnong Nongtalang kala ktah ia ka mariang bad khamtam ia ka umbam umdih jong kane ka shnong Nongtalang.

“Baroh shikatta ka shnong Nongtalang ka dei ka shnong kaba pahuh ka umbam umdih, hynrei ha kine ki khyndiat snem naduh bala sdang ban tih mawshun, ka um kala sniew bad ki tyllong um kila shah ktah ha kaba ka tnad PHE kaba sam umbam umdih iaka shnong Nongtalang Mission kala ong ba ym bit ban dih,” la ong u Waheh Shnong ka Nongtalang Mission u Ma Batkupar Rymbui.

Ula ong ruh ba ki paid nongshong shnong ka Nongtalang Mission kila ud ïaka jingjakhlia ka um hadien ka jingwan u slap ba jur bad haka 29 tarik u Iaiong. Ka um kaba wan na tyllong um ka shnong na Amkru kaba don shajan ki par tih mawshun kham pajih na New Nonglamin kala kylla um ktieh bad ka bor shnong kala pyntip sha ka PHE ha kaba na kaliang ki Engineer ka PHE, SDO, JE kila wan ban jurip bad pynthikna ba kam bit ban pyndonkam ïaka um ban dih bad kala pynsangeh iaka jingsam um shapoh shnong.

Kane ka jingpyndam ka PHE ban sam um bad ka jingjakhlia ka um kala ktah ïaki 135 tylli ki longïing ka Nongtalang Mission bad kila hap ban leit tong um ban ioh pyndonkam haiing haka jingjngai kaba 1-2 KM.

U Waheh Shnong Ma Batkupar Rymbui, u Secretary Shnong Ma Formi Rymbui bad kiwei kiwei ki dkhot shnong kila pynpaw ka jingbynniaw halor ka jingshah ktah ka tyllong umbam umdih ka shnong bad kila kyrpad ïaki trai tih mawshun ban sangeh ha kaban tih shajan ki tyllong um shapoh ka shnong.

U Secretary Shnong ma Formi ula byrthen ruh ba lada ki nongtih mawshun ki leh bymsuidniew ïaka jingud jingnam jong ngi bad leh bym salia ban pynjulor iaki tyllong um kin shim iaki rai ba tyngeh.