Kop u Conrad ba heh ka ïarong pisa Tourism ha Kudengrim ka jaka thymmai ban shangkai

Syllad | The Rising MeghalayaJanuary 31, 2019

JOWAI: U Conrad Kongkal Sangma Myntri Rangbah ka Jylla ula kren kop ba ka heh ka ïarong pisa ban kyntiew ïaka kam jngohkai pyrthei haka Jylla. U Conrad ula ong ba ka sorkar pdeng kala theh T.200 klur ban kyntiew bad ban pynbha ïaki kam jngohkai haka jylla baroh kawei.

“Tang ka West Jaiñtia Hills ban kyntiew ïaki jaka jngohkai jong ka ka sorkar jylla kala ai bhah T.22 klur ban pynbha ïaki jaka jngohkai”, la ong u Conrad haba kren haka jingïalang plie ïaka jaka jngohkai ka shnong Kudengrim haka sngi Palei.

Ka Kudengrim, ka dei ka shong kaba jngai tang 25 KM na Amlarem bad 50 na Jowai ka don ka jingkieng jri ba ar mala bad ki shi mala kaba la shna pynbha da ki nongshong shnong, ka don ka kshaid kaba itynnad ha ka wah Amlamar, ki ïing skhen ban peit kai bad ki lynti ïaid kjat da ki skhen ban poi sha ka kshaid Amlamar.

Ka don ruh ki lynti ïaid kjat bala oh shrong da ki maw bad ki jinghkieng doi doi ki bad kiwei kiwei.

Ki samla shnong bad ki nongïalam shnong ka shong Kudengrim naduh mynshem snem ha u Naiwieng kila pynsaphriang ïaka khubor lyngba ki lad pathai khubor ‘social media’ halor ka jingitynnad ka jaka bad kala khring ïa kiba ba bun ban wan shangkai sha katei ka shnong; kaba nakaliang u Conrad ula ïaroh bad ula pynshlur ba kane ka dei ka buit ban saphriang ïaki jingdon ka jaka shangkai sha ka pyrthei.

Hadien bala thaw ïaka Kudengrim Tourism and Environmental Protection Society (KTEPS), ki samla bad rangbah kila sdang ban shna jingkieng jri bad ki lynti ban poi sha ka kshaid Amlamar da ki siej.

U Conrad Sangma ula ong ba ka sorkar MDA kala shimkhia bha ban kyntiew ïaka kam jngohkai pyrthei  bad ula ong “Shen ka shnong jong phi kan ïoh ka surok ban pynïasoh bad ka Sohkha, Dawki bad kiwei ki shnong ba marjan ban khring ïa ki nongwan shangkai”.

“Phi dei ban lah ban khring ïa ki nongwan kai na ri thor na Bangladesh bad ban pynsah kham bun sngi sha kane ka jaka ba ngi pylut por haka dih ka bam kum ka kyiad, kaba ri Bangladesh ka dei ka ri tyrkhong Kyiad”, la ong u Conrad.

“Ka kam jngohkai ka dei kawei na ki lad ban kamai jakpoh, phi dei ban trei shitom ban pynneh pynsah  ïaka jingitynnad ka mariang bad wat shna kino kino ki jintei ban pynjulor ïaka jingitynnad ”, ong u Myntri Rangbah ka Jylla.