Kner jingiarap ka Sarot I Man ha Mukhla Umlangshor

Syllad | The Rising MeghalayaMarch 8, 2021

Ka Sarot I Man, kawei na ki kynhun na Jowai haka Sngi U Blei ka la leit ai jingïarap ïa kiba duk ba kyrduh hapoh ka shnong Umlangshor, Mukhla, West Jaiñtia Hills District.

Ha shwa ban sam ïa ki jingai sngewbha, u Waheh Shnong jong ka shnong u ma Cherterfield Lyngdoh u la pdiang burom ïa ki dkhot jong ka Sarot I Man bad la aiti ha u ma Kyllimot Lhuid dkhot jong ka Sarot I Man ban pynïaid ïa ka jingïalang.

Ha katei ka jingïalang, la sdang nyngkong da ka jingduwai na u ma Barlee Moore Shilla bad pynbud ïa ka jingkren na u ma Riquoma Rq. Laloo bad u ma Jaitda oo Sumer kiba dei ruh ki dkhot jong ka Sarot I Man nangta la ïoh ruh ïa ka jingkren na ka liang jong ka shnong da i bah Tiplem Sumer bad la ai khublei da u ma Aziz War badei u dkhot ka Sarot I Man.

“Kane ka kynhun kam dei ka ka seng kaba ïadei bad kano kano ka kam saiñ pyrthei; kadei tang ka kynhun jong ki 12ngut shi paralok, kiba don kajuh ka jingthmu da ka jingïa sngewthuh lang ban trei na ka bynta ka bha ka miat ha ka imlang ka sahlang. La seng ia ka Sarot I Man haka 16 tarik u Nohprah 2020 daka jingthmu ban ïarap ïa ki duk ki suk sha ki thaiñ nongkyndong kiba dei shisha ban ïoh ïa kata ka jingïarap la ha kano kano ka rukom ruh. Kum ka jingsdang kane ka kynhun kala larai ban lumlang ïa ki sopti kiba lah dep pyndonkam na ki ïing ki sem ki jong ki, tangba ymdei kiba lah sniew, dei ban ai da kiba dang long ban pyndonkam bad kiba bha,” la ong Riquoma Rq. Laloo.

U Ma Jaitda OO Sumer pat ula kren shaphang ka jingkordor jong ka koit ka khiah ha ka jingim u briew bad ban long kiba lehkhuid bad pynneh pynsah ïa ki dieng, ki jingthung, ka um bad kiwei kiwei ki jait jingim kiba don ha ka Mei Ram-ew. “Ngi la ïoh iaka lyer kaba khuid, ngim dei ban pynjulor iaka sawdong sawkun ka mariang da kaba thang pathar ïa ki khlaw ki bthap kiba lah ban ktah ïa ki dieng kiba dangrit,” la ong u ma Sumer.

U la kyntu ruh ïa ki longkpa banlong ki briew kiba tip ïa ka ïing ka sem, ki khun ki kti; ymdei ban ngop ha ki jingdih ba bunjait kiba ktah ïa ka imlang sahlang.

U ma Tiplem, ula pynpaw iaka jingkmen bad ka jingsngewnguh iaka kynhun Sarot I Man kiba la jied nyngkong ïa ka shnong jong ki ban wan ai ïa ka jingïarap. U la pynpaw ruh ka jing sngewnguh ïa ki para shnong, kiba lawan ban pdiang ïa ka jingïarap.