Kner jingiarap ka Dorbar Shnong Ladthadlaboh sha ki 255 tylli longïing

Syllad | The Rising MeghalayaMay 5, 2020

Ka Dorbar Shnong Ladthadlaboh kala kner la ka kti jingiarap jong ka sha ki 225 tylli ki longïing da u khaw haka sngi ba Ar.

Kine ki longïing kiba la ïoh jingmyntoi ki don palat 1000 ngut.

Une u khaw dei uba la synniang da ka ki riew pawkhmat ka shnong ka thaw naduh ki MDC ka thain u ma Brighstar Chyrmang 14 byrni, u MDC ka Jowai Central u ma Awhai Andrew Shhullai 10 byrni, ka Dowell Auto haduh 23 byrni, ka synjuk jong ka Balang Katholik, Jowai 5 byrni, Shiv Mandir Committee 1 Quintal, nalor ki dkhot jong ka Executive Committee jong ka Dorbar Shnong uba la kot sha ka 100 byrni.

U Ma LD Lakiang, ula ong ba ïa une u khaw ba la synniang ki riew paw khmat bad ki synjuk bad ki executive committee la sam sha baroh ki nongshong shnong kiba duk kiba kyrduh bad kiba sah ïing wai hapoh u pud u ang jong ka shnong kiba shah ktah naka lockdown.

“Ka Dorbar Shnong ban snohkti lang bad ka sorkar ha kane ka jingiakhun pyrshah ïaka khlam COVID-19, kala dep ban thaw ïaka Village COVID-19 Management Committee. Ka Dorbar Shnong ka pdiang sngewbha ia baroh ki khun ka shnong kiba wanphai na ki jaka bapher bapher bad ka shnong kala long kaba pynkhreh ban ai jaka sah ba kyrpang ha Indoor Hall ka shnong,” la ong u Ma LD Lakiang bad bynrap ruh ba kane ka jingïakhun ïaka khlam COVID-19 kan dang shimpor bad na kaliang ka shnong kala long kaba pynkhreh bad la banjur ïaki paidbah nongshong shnong ban bud ryntih ïaki jingbthah jong ka tnad ka koit ka khiah ban iada ialade na kane ka khlam.

Ha kane ka jingsam khaw ka shnong Ladthalaboh la ïadonlang u president ka Synjuk Waheh Shnong Jowai Alan Ñiangti, u ma Pyrkhat Shylla Vice President Synjuk Waheh Chnong nalor kiwei kiwei ki dkhot executive member ka shnong Ladthadlaboh.