Kmen ka Synjuk Waheh shnong Ri Jaintia ba mang T.26 klur ban tei pyndep iaka Iawmusiang

Syllad | The Rising MeghalayaNovember 20, 2024

Ka Synjuk Waheh shnong Ri Jaintia (SWRJ) haka jingialang General Executive Committee kaba la long ha ophis treikam ka synjuk ha Mihmyntdu haka 19 tarik Naiwieng, kala rai ban kyntu iaka Executive Committee (EC) jong ka Jaintia Autonomous District Council (JHADC) ban pyndep noh iaka jingtei iaka Iawmusiang Complex.

U President ka Synjuk Ma Arminus Lipon haba kren hadien ka jingialang ula ong, ka synjuk haka jingialang kala iakren ia kiba buh bah ki mat kiba ka synjuk kala iaid lynti bad pynsngew sha ka sorkar na ka bynta ka bha ka miat ki nongshong shnong ka ri lum Jaintia.

Kawei ka mat kaba ka synjuk ka la iaid lynti ka long halor ka Iawmusiang Complex bad u pynpaw ruh ka jingkmen ba ka sorkar Jylla kala mang iaka song pisa kaba 26 klur tyngka na ka bynta ban shna pyndep noh ia ka iew Iawmusiang kaba la ap khmih lynti la slem bah.

Ka Synjuk ka khmih lynti ba ka EC jong ka JHADC hapoh ka jingialam u CEM Ma Thombor Shiwat kan ialeh katba lah kloi ban pyndep noh iaka jingtei iaka Iawmusiang khnang ba kan long ka jingkyrkhu khamtam iaki nongshong iew shonghat kiba ju shongdie jingdie harud surok.

Kiwei de ki mat kiba ka synjuk kala iakren ha kane ka jingialang ki long ban kyrpad iaka JHADC ban pyllait iaki Dorbar shnong na kaba leit register hapoh ka Society Act 1980 namar ba iaki dorbar shnong la pynkup bor bad ithuh da ka JHADC.

La iakren ruh halor ka jingeh jong ki paidbah haba ki leit donkam ha District konsil namar iaki kam kiba iadei bad ka konsil jong ki ym lah ban pyndep haka por kaba biang bad ba na ka por sha ka por ki nongtrei jong ka JHADC ruh ki juh pynsngew sha ka synjuk halor ka jingbym ioh tulop bad ka synjuk ka kyntu ruh iaka sorkar ban pyllait ia ka bhah jong ka konsil khnang ba ka konsil kan lah ban siew dep noh ia baroh ka tulop basah jong ki nongtrei ka JHADC.